Gürcüstanın hakim “Gürcü Arzusu” partiyası mitinqlərin keçirilməsi qaydalarının sərtləşdirilməsi ilə bağlı qanunvericiliyə dəyişikliklər hazırlayıb.

Layihəyə əsasən, üzünü gizlətməklə, gözyaşardıcı və ya zəhərli maddələrdən istifadə etməklə, yolları bağlamaqla və ya müvəqqəti qurğular quraşdırmaqla keçirilən aksiyalarda iştirak edən şəxslər 15 gün, təşkilatçılar isə 20 gün müddətinə inzibati qaydada həbs ediləcək.

Bundan əlavə, aksiya zamanı silah və ya pirotexniki vasitə saxlamaq, polisin mitinqi dayandırmaq tələbinə tabe olmamaq hallarında 60 günədək həbs nəzərdə tutulur.

Təkrar belə hərəkətlərin törədilməsi isə cinayət məsuliyyəti yaradacaq və bu halda bir ilə qədər azadlıqdan məhrumetmə, təkrar cinayətlərdə isə iki ilə qədər həbs cəzası tətbiq ediləcək.

Qanun layihəsində həmçinin polis əməkdaşına qarşı təkrar və sistematik təhqir və itaətsizlik hallarında bir ilə qədər, təkrar halda isə iki ilə qədər həbs cəzası nəzərdə tutulur. Parlament çoxluğunun lideri İrakli Kirtsxaliya bildirib ki, bu hallarda alternativ cəza növləri tətbiq edilməyəcək.

Gürcüstanda etirazlar 2024-cü ilin noyabrında hökumətin Avropa İttifaqına üzvlük danışıqlarının dayandırıldığını açıqlamasından sonra başlayıb.

Oktyabrın 4-də Tbilisidə keçirilən bələdiyyə seçkiləri günü “sülh yolu ilə hakimiyyətin devrilməsi” məqsədilə mitinq təşkil olunub. Bir qrup nümayişçi Prezident Sarayının ərazisinə daxil olub, hüquq-mühafizə orqanları isə etirazçılara qarşı gözyaşardıcı qaz və su şırnaqlarından istifadə edib.

Nəticədə onlarla şəxs saxlanılıb. Baş nazir və “Gürcü Arzusu” partiyasının sədri İrakli Kobaxidze bildirib ki, etiraz aksiyasına görə bütün məsul şəxslər ciddi şəkildə cəzalandırılacaq.