Prezident İlham Əliyev Birinci Türkoloji Qurultayın 100 illik yubileyinin keçirilməsi ilə bağlı Sərəncam imzalayıb.

Sənəd Azərbaycan Respublikası Konstitusiyasının 109-cu maddəsinin 32-ci bəndinə əsasən, Birinci Türkoloji Qurultayın Azərbaycanın və bütövlükdə türk dünyasının XX əsr elmi-mədəni həyatında mühüm hadisə kimi dəyərləndirilməsini nəzərə alaraq imzalanıb.

Sərəncama əsasən, Mədəniyyət Nazirliyi, Azərbaycan Milli Elmlər Akademiyası və Elm və Təhsil Nazirliyi ilə birlikdə yubileyə dair tədbirlər planı hazırlayıb həyata keçirəcək. Həmçinin, Nazirlər Kabinetinə bu sərəncamdan irəli gələn məsələlərin həll edilməsi tapşırılıb.

Qeyd olunub ki, 2026-cı ilin fevral ayında Bakı şəhərində Birinci Türkoloji Qurultayın 100 illiyi tamam olur.

Birinci Türkoloji Qurultay türk xalqlarının ortaq mədəni inteqrasiyasında mühüm mərhələ olub. Qurultayda türkologiyanın aktual problemləri, türk dilləri, ədəbiyyatı, tarixi və mədəniyyətinin gələcəyi ilə bağlı məsələlər geniş müzakirə edilib, latın qrafikasına əsaslanan ümumtürk əlifbası ideyası xüsusi diqqət mərkəzində dayanıb.

Sərəncamda vurğulanır ki, həmin dövrdə irəli sürülən ideyaların həyata keçməsi sovet totalitar rejiminin yaratdığı maneələrlə dayandırılsa da, müstəqillik dövründə türk xalqlarının mənəvi dirçəlişi və ümumtürk birliyi istiqamətində əhəmiyyətli addımlar atılıb.

Xatırladaq ki, Türk Dövlətləri Təşkilatının 2025-ci il oktyabrın 6–7-də Qəbələdə keçirilən 12-ci Zirvə Görüşünün Bəyannaməsində də Birinci Türkoloji Qurultayın 100 illik yubileyinin qeyd olunması çağırışı yer alıb.