Azərbaycan Respublikasının Prezidenti İlham Əliyev oktyabrın 28-də Cəbrayıl şəhərində məscid tikintisinin təməlini qoyub.

“PMD Projects” şirkətinin direktoru Nəriman Topçibaşev dövlət başçısına görüləcək işlər barədə məlumat verib. Məscidin ümumi sahəsi 1 530 kvadratmetrdən çox olacaq və burada eyni vaxtda 615 nəfər ibadət edə biləcək. İkimərtəbəli binada həm kişilər, həm də qadınlar üçün ibadət şəraiti təmin olunacaq.

Layihəyə görə, məsciddə icma zalı, avtomobil dayanacağı və söhbətgah yaradılacaq. Minarələrin hündürlüyü 34,2 metr, günbəzin hündürlüyü isə 22,6 metr planlaşdırılıb.

Qeyd edək ki, işğaldan əvvəl Cəbrayıl rayonunda 5 məscid, 40-dan çox ziyarətgah və 20-dən artıq tarixi-memarlıq abidəsi mövcud olub. İşğal dövründə bu abidələr digər ərazilərimizdə olduğu kimi ermənilər tərəfindən məhv edilib.

Torpaqların işğaldan azad edilməsindən sonra Qarabağ və Şərqi Zəngəzurun tarixi-dini və mədəni abidələrinin bərpası, yenilərinin inşası istiqamətində Azərbaycan dövləti mühüm addımlar atıb. Bu xüsusda 2017-ci ildə Cocuq Mərcanlı kəndində inşa edilən, Şuşa məscidinin bənzəri olan məscid nümunə olaraq göstərilir.