USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Ərəstun Oruclu Baş Prokurorluğa çağırılıb
Amerikada yaşayan siyasi şərhçi Ərəstun Oruclu Azərbaycan Baş Prokurorluğuna çağırılıb. Bu barədə qurumun rəsmi müraciəti noyabrın 14-də İctimai Televiziyada yayımlanıb.
Məlumata görə, Ə. Oruclu təqsirləndirilən şəxs qismində noyabrın 21-i saat 14:00-da Baş Prokurorluğun İstintaq Baş İdarəsinə gəlməlidir.
Baş Prokurorluq bildirib ki, siyasi şərhçi barəsində Cinayət Məcəlləsinin 281.2-ci maddəsi (dövlət əleyhinə yönələn açıq çağırışlar; təkrar və ya bir qrup şəxs tərəfindən törədildikdə) ilə cəlbetmə haqqında qərar qəbul edilib. Qurumun məlumatına görə, Oruclu istintaqdan yayındığı üçün barəsində axtarış elan olunub və Binəqədi Rayon Məhkəməsinin 23 fevral 2024-cü il tarixli qərarı ilə qiyabi həbs qətimkan tədbiri seçilib.
Baş Prokurorluğun açıqlamasında qeyd olunur ki, 18 sentyabr 2024-cü ildə iş üzrə ittihamın məzmunu genişləndirilərək Ərəstun Oruclu Cinayət Məcəlləsinin 220.2-ci (kütləvi iğtişaşların təşkili və ya buna çağırışlar) və 281.2-ci maddələri ilə təqsirləndirilən şəxs qismində cəlb edilib.
Qurumun iddiasına görə, Ərəstun Oruclu:
• 4 yanvar 2023-cü ildə “YouTube”da “Ərəstun Oruclunun kanalı”nda,
• 24 oktyabr 2024-cü ildə “Azərfreedom TV” kanalında
qabaqcadan əlbir olan bir qrup şəxslə birlikdə Azərbaycan hakimiyyətinə qarşı zor tətbiq etməyə çağırış xarakterli çıxışlar edib və yayıb.
Ərəstun Oruclu uzun illər ictimai-siyasi şərhləri ilə tanınır və sosial şəbəkələrdə Azərbaycan hakimiyyətini tənqid edən mövqeyi ilə diqqət çəkir.
