2026-cı ilin dövlət büdcəsində səhiyyə sahəsinə ayrılan vəsait ciddi şəkildə artırılır. Bu barədə maliyyə naziri Sahil Babayev Milli Məclisin bugünkü plenar iclasında “2026-cı il dövlət büdcəsi haqqında” qanun layihəsinin müzakirəsi zamanı məlumat verib.

Nazirin sözlərinə görə, gələn il təkcə dövlət büdcəsindən səhiyyə xərcləri üçün 2 milyard manat ayrılması nəzərdə tutulur. Bu rəqəm 2024-cü ilin icra göstəriciləri ilə müqayisədə 11 faiz çoxdur və dövlət büdcəsi xərclərinin 4,9 faizini təşkil edir.

Sahil Babayev bildirib ki, icmal büdcə çərçivəsində səhiyyə xərclərinin ümumi məbləği isə 2026-cı ildə 3,7 milyard manat olacaq. Bu da 2025-ci illə müqayisədə 227 milyon manat və ya 6,4 faiz artım deməkdir.

Nazir qeyd edib ki, səhiyyə sahəsinə ayrılan vəsaitlərin artırılması tibbi xidmətlərin keyfiyyətinin yaxşılaşdırılması, infrastrukturun gücləndirilməsi və əhalinin sağlamlıq təminatının genişləndirilməsi məqsədi daşıyır.