İsrailin xarici kəşfiyyat xidməti “Mossad”ın “X” (keçmiş Twitter) hesabında Azərbaycanla bağlı paylaşım edilib.

Paylaşımda bildirilib ki, Azərbaycan öz qoşunlarının Qəzza zolağına yerləşdirilməsini istisna edir. “Mossad” Azərbaycan Prezidenti İlham Əliyevin mövqeyinə istinad edərək qeyd edib ki, Bakı Qəzzaya da daxil olmaqla, xarici ölkələrə qoşun göndərmək və hər hansı beynəlxalq sülhməramlı missiyada iştirak etmək niyyətində deyil.

Paylaşımda Prezident İlham Əliyevin sözlərindən sitat da yer alıb:
“Azərbaycan xaricə, o cümlədən Qəzzaya qoşun göndərməyəcək və heç bir beynəlxalq sülhməramlı qüvvədə rol almayacaq. Bakı Tramp administrasiyası ilə müzakirələri təsdiqləyib, lakin açıq şəkildə bildirib ki, sülhməramlı qüvvələrdə iştirak nəzərdə tutulmur”.

“Mossad”ın açıqlamasına görə, bu bəyanat ABŞ-nin rəhbərliyi altında Qəzza ilə bağlı irəli sürülən sülh planı çərçivəsində mümkün Beynəlxalq Sabitləşdirmə Qüvvələrinin yaradılması mövzusunda danışıqların davam etdiyi bir vaxtda səsləndirilib.