Tacikistan Respublikasının Prezidenti Emoməli Rəhmon Azərbaycan Prezidenti İlham Əliyevə təbrik məktubu ünvanlayıb.

Məktubda İlham Əliyevin nüfuzlu “Zayed İnsan Qardaşlığı Mükafatı”na layiq görülməsi münasibətilə səmimi təbriklər ifadə olunub.

“Hörmətli İlham Heydər oğlu.
Sizi nüfuzlu “Zayed İnsan Qardaşlığı Mükafatı”na layiq görülməyiniz münasibətilə səmimi-qəlbdən təbrik edirəm. Bu təşəbbüs konstruktiv siyasətin və dözümlülüyün təşviqi yolu ilə davamlı sülhə və sabitliyə nail olmaq üçün ardıcıl səylərinizin, güclü iradənizin tanınmasının daha bir təsdiqidir”, – deyə məktubda qeyd olunub.

Tacikistan Prezidenti Azərbaycan ilə Ermənistan arasında Sülh Sazişinin imzalanmasını iki dövlət arasında dostluq münasibətlərinin və qarşılıqlı faydalı əməkdaşlığın gücləndirilməsi, həmçinin Qafqaz regionunda və onun hüdudlarından kənarda sülhün və təhlükəsizliyin möhkəmləndirilməsi baxımından mühüm amil kimi qiymətləndirib.

Emoməli Rəhmon Tacikistanın sülhsevər dövlət olaraq bu konstruktiv və tarixi nailiyyəti alqışladığını vurğulayıb, bütün mübahisə və münaqişələrin yalnız siyasi-diplomatik yollarla həllinə sadiq olduqlarını bəyan edib.

Məktubun sonunda Tacikistan Prezidenti İlham Əliyevə möhkəm cansağlığı və uğurlar, Azərbaycan xalqına isə davamlı sülh və tərəqqi arzulayıb.