Fevralın 17-də ölkə ərazisində qeydə alınan 73, əvvəlki dövrlərdən bağlı qalan 10 cinayətin açılması polis əməkdaşları tərəfindən təmin olunub.

Azərbaycan Respublikası Daxili İşlər Nazirliyinin Mətbuat Xidmətindən verilən məlumata görə, axtarışda olduğuna görə ümumilikdə 171 nəfər saxlanılıb. Onlardan 143-ü borclu şəxs qismində axtarışda olanlar, 8-i ailə üzvlərini məlumatlandırmadan yaşadığı ünvanı tərk etdiyinə görə itkin düşmüş kimi axtarılanlar, daha 8 nəfər isə dələduzluğa görə axtarışda olan şəxslərdir. Saxlanılanlar aidiyyəti üzrə təhvil verilib.

Həmçinin narkotiklərlə əlaqədar 47 fakt müəyyən edilib. Keçirilən əməliyyat tədbirləri nəticəsində ümumi çəkisi 67,2 kiloqramdan artıq narkotik vasitə aşkar olunaraq götürülüb.

Eyni zamanda qanunsuz saxlanılan silah-sursatın aşkarlanması ilə bağlı 17 fakt qeydə alınıb. Paytaxtda və respublikanın müxtəlif rayonlarında 1 avtomat, 1 pulemyot, 1 tapança, 1 qumbara, 11 tüfəng, 10 patron darağı, 458 ədəd müxtəlif çaplı patron və 192 ədəd mərmi aşkar edilərək götürülüb.

Bundan başqa, cinayət törətməkdə şübhəli bilinən 73 nəfər də saxlanılıb.