Azərbaycan Prezidenti İlham Əliyevin Sülh Şurasının ilk iclasında iştirak məqsədilə Amerika Birləşmiş Ştatlarına səfəri çərçivəsində fevralın 19-da Vaşinqton şəhərində insident baş verib.

Azərbaycanın ABŞ-dəki səfirliyinin yaydığı bəyanata görə, bir qrup etirazçı Prezidentin qaldığı Waldorf Astoria Washington DC mehmanxanasının qarşısında təxribat xarakterli hərəkətlər edib. Prezident korteji əraziyə yaxınlaşarkən etirazçıların mühafizə olunan zonaya zorla daxil olmağa cəhd göstərdiyi və avtomobilə yönəlik hücum xarakterli hərəkətlər etdiyi bildirilib. Həmçinin Azərbaycan rəhbərliyinə qarşı nalayiq ifadələr səsləndirildiyi qeyd olunub.

Bəyanatda vurğulanıb ki, dövlət başçısının mühafizə edilən nəqliyyat vasitəsinin hərəkətinə maneçilik törədilməsi və ya fiziki müdaxilə ciddi təhlükəsizlik riski yaradır. Bu səbəbdən Prezidentin Təhlükəsizlik Xidməti standart əməliyyat prosedurlarına uyğun şəkildə müdaxilə edib və tədbirlər yalnız təhlükəsizliyin təmin edilməsinə yönəlib.

Sənəddə əlavə olunub ki, United States Secret Service tərəfindən də bildirildiyi kimi, mehmanxana ərazisi rəsmi təhlükəsizlik perimetrinə daxil olub.

Səfirlik həyata keçirilmiş təhlükəsizlik tədbirlərinin yanlış təqdim olunmasını və əsaslandırılmamış iddiaların yayılmasını qətiyyətlə rədd etdiyini bəyan edib. Qurum həmçinin Azərbaycanın təhlükəsizlik əməkdaşlarının hər zaman ev sahibi ölkənin müvafiq qurumları ilə sıx koordinasiya şəraitində fəaliyyət göstərdiyini vurğulayıb.

Sonda media nümayəndələrinə xəbərləri yayarkən məsuliyyətli davranmaq və təsdiqlənməmiş iddialara əsaslanaraq nəticə çıxarmamaq çağırışı edilib.