Avropa Şurasının Baş katibi Alain Berset parlament üzvlərini demokratiyanın gücləndirilməsi və Ukraynaya dəstəyin davam etdirilməsi istiqamətində daha fəal olmağa çağırıb.

Bu barədə o, Avropa Şurası Parlament Assambleyası çərçivəsində keçirilən sual-cavab sessiyasında çıxışı zamanı bildirib.

Berset qeyd edib ki, Avropa üçün mövcud böhranlar uzaq deyil və qitənin enerji, iqtisadiyyat və təhlükəsizlik maraqları ilə birbaşa bağlıdır:
“Avropa coğrafi reallıqdır. Heç bir böhran bizdən uzaq deyil”.

Baş katib hazırkı dövrü “dərin geosiyasi gərginlik” mərhələsi kimi qiymətləndirərək, xüsusilə Ukraynaya qarşı davam edən müharibə, Yaxın Şərqdəki vəziyyət və demokratiyaya artan təzyiqləri vurğulayıb.

O, Ukraynaya dəstəyin davam etdirilməsinin vacibliyini qeyd edərək, Rusiyanın təcavüzünə görə məsuliyyətin müəyyənləşdirilməsi məqsədilə xüsusi tribunalın yaradılması istiqamətində işlərin davam etdiyini diqqətə çatdırıb. Berset bildirib ki, bu təşəbbüsün reallaşması üçün üzv dövlətlərin daha fəal mövqeyi zəruridir.

Baş katib çıxışında Avropa İnsan Hüquqları Məhkəməsinin müstəqilliyinə də toxunub və bu prinsipin “toxunulmaz” olduğunu vurğulayıb. O qeyd edib ki, bəzi ölkələrdə məhkəmənin müstəqilliyinin sual altına alınması ciddi narahatlıq doğurur və bu məsələyə siyasi səviyyədə yanaşılmalıdır.

Alain Berset əlavə edib ki, Avropa Şurası dəyişən qlobal şəraitə uyğunlaşmalı, lakin öz əsas dəyərlərindən – demokratiya, insan hüquqları və hüququn aliliyindən geri çəkilməməlidir.