Ermənistanın baş naziri Nikol Paşinyan Ermənistan və Rusiya arasında münasibətlərdə böhran olması ilə bağlı iddiaları rədd edib. O, parlament seçkilərində səs verdikdən sonra jurnalistlərə açıqlamasında bu mövzuda aparılan müzakirələrin süni şəkildə yaradıldığını bildirib.

Paşinyanın sözlərinə görə, İrəvan və Moskva arasındakı münasibətlər qarşılıqlı hörmətə əsaslanır və institusional xarakter daşıyır.

“Gərginlik görmürəm. Ermənistanda bəzi qüvvələr belə bir gərginlik yaratmağa çalışırlar, lakin bu baş vermir”, – deyə baş nazir vurğulayıb.

Rusiya tərəfindən Ermənistan məhsullarının idxalına tətbiq edilən məhdudiyyətlərə toxunan Paşinyan bunu Avrasiya İqtisadi İttifaqı çərçivəsində normal iş prosesi kimi qiymətləndirib. O bildirib ki, fitosanitar tələblər, ixrac və təkrar ixrac qaydaları, eləcə də malların mənşəyi ilə bağlı məsələlər ittifaq üzvü olan ölkələr arasında mütəmadi olaraq müzakirə edilir.

Baş nazir həmçinin seçkilərdə qələbə qazanacağı təqdirdə Rusiyaya səfər edəcəyi ilə bağlı əvvəlki açıqlamasını xatırladaraq, Moskva ilə münasibətlərdə problem olmadığını bir daha vurğulayıb.

“Moskvaya da gedəcəyəm, Vaşinqtona, Brüsselə, Parisə və Tbilisiyə də. Həmçinin Bakıda keçiriləcək Avropa Siyasi Birliyinin sammitində iştirak etmək imkanı əldə edəcəyimə ümid edirəm. Beynəlxalq əlaqələrimizi hərtərəfli inkişaf etdirmək niyyətindəyik”, – deyə Paşinyan bildirib.

Son illərdə Ermənistanın Kollektiv Təhlükəsizlik Müqaviləsi Təşkilatı (KTMT) fəaliyyətini tənqid etməsi və Avropa İttifaqı ilə yaxınlaşma siyasəti fonunda İrəvan-Moskva münasibətlərində gərginlik müşahidə olunur.

Bu fonda Rusiya Ermənistan məhsullarına qarşı bir sıra məhdudiyyətlər tətbiq edib. Məhdudiyyətlər alkoqollu içkilər, “Jermuk” mineral suyu, balıq məhsulları, gül ixracı, eləcə də çəyirdəkli meyvə və üzüm tədarükünü əhatə edib.

Rusiya rəsmiləri eyni zamanda Ermənistanın Avropa İttifaqı ilə daha sıx inteqrasiyası halında ölkənin Avrasiya İqtisadi İttifaqı çərçivəsində əldə etdiyi iqtisadi güzəştləri itirə biləcəyi barədə xəbərdarlıq ediblər.

Paşinyan isə Rusiya məhdudiyyətlərindən zərər çəkən biznes subyektlərinə subsidiyalar veriləcəyini və onlar üçün yeni bazarların axtarılacağını bəyan edib.