Azərbaycan Prezidenti İlham Əliyev ABŞ Prezidenti Donald Trampa 80 illik yubileyi münasibətilə təbrik məktubu göndərib.

Məktubda dövlət başçısı Trampa möhkəm cansağlığı, uzun ömür və dövlətçilik fəaliyyətində yeni uğurlar arzulayıb.

İlham Əliyev ABŞ-Azərbaycan münasibətlərinin inkişafında Donald Trampın rolunu yüksək qiymətləndirib və iki ölkə arasında strateji tərəfdaşlığın möhkəmlənməsinə verdiyi töhfələri qeyd edib.

Prezident bildirib ki, ötən ilin avqustunda Ağ Evdə keçirilən görüş və daha sonra Strateji Tərəfdaşlıq Xartiyasının imzalanması Azərbaycan-ABŞ əlaqələrini yeni mərhələyə yüksəldib.

Təbrik məktubunda Cənubi Qafqazda sülh gündəliyinə də toxunulub. İlham Əliyev Vaşinqtonda imzalanmış Üçtərəfli Birgə Bəyannaməni və Ermənistanla sülh sazişinin paraflanmasını regional sabitliyin təmin olunması istiqamətində mühüm addımlar kimi qiymətləndirib.

Azərbaycan Prezidenti, həmçinin Azərbaycanı Naxçıvanla birləşdirəcək və Orta Dəhlizin bir hissəsi kimi təqdim olunan “Beynəlxalq Sülh və Rifah üçün Tramp Yolu” (TRIPP) layihəsinin regionda əməkdaşlığa töhfə verəcəyini vurğulayıb.

İlham Əliyev məktubunda Azərbaycan və ABŞ arasında ticarət, iqtisadiyyat, investisiya, enerji, təhlükəsizlik, texnologiya və digər sahələrdə əməkdaşlığın daha da inkişaf etdirilməsi üçün birgə səylərin davam etdiriləcəyinə əminliyini ifadə edib.

Dövlət başçısı Donald Trampa və ailəsinə xoş arzularını çatdıraraq, ABŞ xalqının rifahı naminə fəaliyyətində uğurlar arzulayıb.