Vaşinqtonda ABŞ Prezidenti Donald Tramp, Azərbaycan Prezidenti İlham Əliyev və Ermənistanın Baş naziri Nikol Paşinyan arasında üçtərəfli tarixi Birgə Bəyannamə imzalanıb. Razılaşmanın əsas məqamları sırasında Zəngəzur dəhlizinin (“Tramp marşrutu”) 99 illiyə ABŞ-yə verilməsi, 907-ci düzəlişin ləğvi və hər iki ölkə ilə strateji tərəfdaşlıq sənədlərinin hazırlanması yer alır.

İmzalanmadan əvvəl Tramp əvvəlcə Paşinyan, daha sonra Əliyevlə təkbətək görüşlər keçirib. Ardınca üç lider bir araya gələrək bölgədə sülh prosesini müzakirə ediblər. ABŞ Prezidenti bildirib ki, “Mənim istəyim bölgədə sülhün və rifahın təmin olunmasıdır” və Azərbaycan ilə Ermənistan arasında davamlı sülhə inamını ifadə edib.

İlham Əliyev çıxışında ABŞ ilə strateji tərəfdaşlıq münasibətlərinin yeni mərhələyə qədəm qoyduğunu vurğulayıb:

“Biz həqiqətən də yeni tarixi səhifəyə imza atırıq”.

O, yaxın aylarda Bakı-Vaşinqton arasında strateji tərəfdaşlıq xartiyasının hazırlanacağını, həmçinin 1992-ci ildən qüvvədə olan və Azərbaycanın ABŞ hökumətindən birbaşa yardım almasını qadağan edən 907-ci düzəlişin ləğvinin önəmini qeyd edib.

Ermənistan Baş naziri Paşinyan isə “Keçmişi keçmişdə qoyaraq irəli baxırıq” deyib və Trampın Nobel Sülh Mükafatına namizədliyini dəstəkləyəcəklərini açıqlayıb. İlham Əliyev də bu təşəbbüsü dəstəkləyərək Paşinyanla birgə Nobel Komitəsinə müraciət etməyi təklif edib.

Tramp “Tramp marşrutu” adlanan və Azərbaycanın əsas hissəsini Naxçıvanla birləşdirəcək yolun 99 illiyə ABŞ-yə verilməsi barədə razılaşmanı açıqlayıb. ABŞ Prezidenti həmçinin hər iki ölkə ilə ikitərəfli sənədlərin də imzalandığını bildirib.