Azərbaycan Prezidenti İlham Əliyevin Özbəkistana dövlət səfəri iki ölkə arasındakı münasibətlər baxımından tarixi əhəmiyyət daşıyır.

Bunu Özbəkistan Prezidenti Şavkat Mirziyoyev Azərbaycan Prezidenti ilə birgə mətbuata bəyanatı zamanı bildirib.

Mirziyoyev qeyd edib ki, səfər çərçivəsində razılaşdırılan və imzalanan məsələlərin hər biri Azərbaycan–Özbəkistan əməkdaşlığının gələcək inkişafı baxımından mühüm hadisədir.

Səfərin əsas nəticələrindən biri iki ölkə arasında “Əbədi dostluq haqqında Müqavilə”nin imzalanması olub. Sənədi İlham Əliyev və Şavkat Mirziyoyev imzalayıblar.

Özbəkistan Prezidenti bildirib ki, yeni müqavilə münasibətlərin çatdığı yüksək səviyyəni nümayiş etdirir. Onun sözlərinə görə, əməkdaşlıq yalnız dövlət başçıları səviyyəsində deyil, hökumətlər, parlamentlər, regionlar və biznes dairələri arasında da genişlənir.

Mirziyoyev vurğulayıb ki, imzalanan sənəd sadəcə siyasi bəyanat deyil, qarşılıqlı fəaliyyəti dərinləşdirmək, əməkdaşlıq imkanlarını genişləndirmək və ortaq gələcək qurmaq istiqamətində iradənin ifadəsidir.

Səfər çərçivəsində Azərbaycan və Özbəkistan Ali Dövlətlərarası Şurasının üçüncü iclası da keçirilib, bir sıra sənədlər imzalanıb və birgə layihələr müzakirə olunub.