Azərbaycan idman aləmində gərginlik yaşanır. Tanınmış idmançı Araz Musayev sosial şəbəkələrdə sərt açıqlama ilə çıxış edərək Eduartı hədəfə alıb.

Musayev paylaşımında bildirib:
“Eduart, əvvəl get adını milliləşdir, sonra Muaytay idman növü haqqında danışarsan. Sən kimsən ki, İslam Oyunlarında iştirak edəsən? Unutma ki, sən polissən, diqqətli ol! Polis bizi qorumalıdır, idmanı və səhnəni qarışdırma!”

Araz Musayev, həmçinin, idman sahəsindəki bəzi şəxsləri ciddi ittiham edib. O bildirib ki, Azərbaycan Kikboks Federasiyasında kriminal hadisələr baş verir:
“Kikboks Federasiyasının prinsipləri budur: cinayətkarlığı artırmaq, sifarişlə xaricdən qatil gətirmək və müxtəlif səhvlərə yol vermək.”

Musayev konkret adlar da çəkib:
“Birinci vitse-prezident, əməkdar kikboks məşqçisi, federasiyanın qurucusu və rəhbəri Azər Həsənov, eləcə də onun müəllimi Vüqar Əsədov Türkiyədə baş vermiş ağır cinayət işində hallanıb, istintaqa çağırılıb.”

Araz Musayev ölkə rəhbərliyinə də müraciət edib:
“Cənab Prezidentdən xahiş edirəm, kikboks idman rəhbərləri istintaqa cəlb olunsun və federasiya rəhbərliyi dəyişdirilsin. Yeni rəhbərlik yalnız idmançılardan və idman mütəxəssislərindən formalaşsın. İdman cinayətkarlara yox, sağlam idmançılara təhvil verilsin.”

İddialara görə, bəzi şəxslər İslam Oyunlarında yeni cinayət planları qururlar:
“Artıq üçüncü dəfə cinayət planı hazırlanır. Bu dəfə İslam Oyunlarında nəsə etmək istəyirlər. Trollar vasitəsilə özlərini ‘cənab’ adlandırıb paylaşdırırlar. Amma biz onların kim olduğunu yaxşı bilirik. Onların ‘güc’ nümayişi dövlətə yox, mənə - Araz Musayevə yönəlib. Amma unutmasınlar, bu ölkədə güc dövlətindir!”

O, idmanın yalnız peşəkar idmançılara və mütəxəssislərə həvalə olunmasını tələb edib:
“İdman kriminal deyil, sağlam düşüncəli idmançıların yeridir. İdmanı cinayətkarlardan təmizləyək!”