Azərbaycan Hava Yollarına (AZAL) məxsus bəzi təyyarələrin Ermənistan hava məkanı üzərindən keçən uçuş marşrutlarında dəyişiklik edilib. Bu barədə Ermənistanın Mülki Aviasiya Komitəsi məlumat yayıb.

Komitənin açıqlamasına görə, marşrut dəyişiklikləri əsasən texniki və təhlükəsizlik səbəbləri ilə həyata keçirilir. Bildirilib ki, Bakıdan Naxçıvana və əks istiqamətdə olan mülki reyslər adətən Dərələyəz və Göyçə vilayətləri üzərindən uçsa da, son dövrlərdə bəzi təyyarələr Zəngəzur vilayəti üzərindən keçməyə başlayıb.

Marşrut dəyişikliyinə səbəb kimi bu amillər göstərilib:
• Əlverişsiz hava şəraiti
• Ekipajların marşrut dəyişdirilməsi ilə bağlı müraciətləri
• Hava məkanında tətbiq olunan müvəqqəti məhdudiyyətlər
• Uçuş təhlükəsizliyini təmin edən tədbirlər

Komitə qeyd edib ki, bu dəyişikliklər Ermənistan hava hərəkəti xidmətləri və hava hücumundan müdafiə strukturları ilə razılaşdırılmış şəkildə aparılır.

Bundan əlavə, İran hava məkanında dövri olaraq tətbiq olunan məhdudiyyətlər də Ermənistan üzərindən uçuşların artmasına səbəb olub. Bildirilib ki, bütün qərarlar yalnız texniki və peşəkar əsaslara, eləcə də uçuş təhlükəsizliyinin qorunmasına əsaslanır.