Tanınmış oftalmoloq Cahid Şahbazovun etdiyi göz əməliyyatından sonra görmə qabiliyyətini itirdiyini iddia edən Humay Əliyevanın şikayəti üzrə başlanmış cinayət işinə xitam verilib. Buna tərəflər arasında əldə olunan barışıq səbəb olub.

Məlumata görə, həkim zərərçəkmiş Humay Əliyevaya kompensasiya ödəyib və tərəflər məsələni qarşılıqlı razılıq əsasında həll ediblər.

Cinayət işi hansı maddə ilə açılmışdı?

Hadisə ilə bağlı Səbail Rayon Prokurorluğunda Cinayət Məcəlləsinin 314.1-ci (səhlənkarlıq) maddəsi ilə cinayət işi başlanmışdı. Bu maddə vəzifəli şəxsin işinə vicdansız və ya laqeyd yanaşması nəticəsində vətəndaşların hüquqlarına ciddi zərər dəyməsini nəzərdə tutur.

Lakin barışıq əldə edildiyi üçün iş üzrə icraat dayandırılıb.

Hadisə necə baş vermişdi?

Xatırladaq ki, iyul ayında Humay Əliyevanın “Caspian International Hospital”da oftalmoloq Cahid Şahbazov tərəfindən səhv diaqnoz əsasında əməliyyat olunduqdan sonra görmə qabiliyyətini itirməsi barədə məlumatlar yayılmışdı. Hadisə geniş müzakirələrə səbəb olmuşdu.

Vəkilin açıqlaması

Cahid Şahbazovun vəkili Asim Abbasov bildirib ki, müvəkkili heç bir mərhələdə cinayət məsuliyyətinə cəlb olunmayıb, yalnız fakt üzrə araşdırmalar aparılıb:

“Müvəkkilimə qarşı ittiham irəli sürülməyib. Cinayət işi yalnız fakt üzrə açılıb və hazırda barışıq səbəbindən xitam verilib”.

Hazırda tərəflər arasında mübahisə tam həll edilib və proses başa çatıb.