“Azəriqaz” İstehsalat Birliyi smart kart tipli bəzi qaz sayğaclarında ödəniş sistemində yaranan problemlə bağlı məlumat yayıb.

Qurumdan bildirilib ki, 2026-cı il yanvarın 1-dən etibarən smart kartlı qaz sayğaclarında ödənişlə bağlı yaranan texniki problem həmin gün axşam saat 20:00-da aradan qaldırılıb. Lakin sonradan kütləvi əməliyyatların aparılması zamanı sistem yenidən xətalarla üzləşib.

“Azəriqaz”ın açıqlamasında qeyd olunur ki, ilin ilk günləri olması səbəbindən müraciətlərin sayı xeyli artıb və bu da sistemdə müəyyən çətinliklərin yaranmasına səbəb olub.

“Müraciətlərin çoxluğu fonunda bəzi texniki xətalar müşahidə olundu. Yaranmış problemin qısa müddətdə tam aradan qaldırılması üçün mütəxəssislər tərəfindən intensiv işlər aparılır”, – deyə məlumatda vurğulanıb.

Qurum abonentlərdən müvəqqəti narahatlığa anlayışla yanaşmağı xahiş edib və problemin tezliklə həll ediləcəyini bildirib.