Rusiyaya məxsus yük təyyarələrinin Tehrana eniş etməsi və geri dönüşdə İrandan qızıl daşıması ilə bağlı iddialar səsləndirilib.

Hərbi ekspert Ədalət Verdiyev bildirib ki, son günlər Rusiyaya aid yük təyyarələri Tehrana eniş edib və bu təyyarələr vasitəsilə İrandan xeyli miqdarda qızıl çıxarılıb.

Onun sözlərinə görə, İran rəhbərliyi ölkədə baş verən proseslər fonunda ən pis ssenariyə — hakimiyyətin mümkün çöküşünə hazırlaşır. Ekspert iddia edir ki, Rusiya təyyarələri Tehrana silah və sursat gətirir, geri dönüşdə isə İranın ali dini lideri Əli Xameneyiyə məxsus olduğu deyilən qızılları daşıyır.

Ə.Verdiyev əlavə edib ki, İran rəsmilərinin bir hissəsi artıq ölkəni tərk etməyə hazırlaşır və daha çox Fransa vizası almağa üstünlük verir. Onun sözlərinə görə, bir sıra dövlətlər də öz vətəndaşlarını İranı tərk etməyə çağırıb və ölkədə vəziyyət getdikcə daha da gərginləşir.

Hərbi ekspert vurğulayıb ki, hazırkı mərhələdə İran etiraz hərəkatının əsas problemlərindən biri müxtəlif etnik və sosial qruplar tərəfindən qəbul edilə biləcək vahid liderin olmamasıdır. Onun fikrincə, şah ailəsinin nümayəndəsi Rza Pəhləvi bu kriteriyalara cavab vermir.

Qeyd edək ki, rəsmi Tehran və Moskva yayılan bu iddialarla bağlı hələlik açıqlama verməyib.