Ermənistan parlamentinin spikeri Alen Simonyan bildirib ki, Bakıdakı erməni məhbusların sonuncusu geri qayıdanadək onların azad olunması ilə bağlı danışıqlar davam etdiriləcək. O, fevralın 16-da jurnalistlərə açıqlamasında Ermənistanla Azərbaycan arasında aparılan prosesin mürəkkəb və çətin olduğunu, lakin irəliləyiş üçün imkan yaratdığını deyib.

“Biz təslim olmamalıyıq. Biz məhz bununla məşğuluq. Hamı geri dönəcək. Bəlkə bu gün deyil, bəlkə sabah deyil, amma nəticədə hər kəs geri dönəcək”, – deyə Simonyan vurğulayıb.

Spiker qeyd edib ki, yaxın keçmişdə Azərbaycanda əsirlikdə təxminən 200 erməni olub və onların geri qaytarılması əvvəlcə mümkünsüz təsir bağışlasa da, ardıcıl səylər nəticəsində bu baş tutub. “Bu iş sonuncu erməni geri dönənə qədər dayandırılmayacaq”, – o əlavə edib.

Azərbaycan Prezidenti İlham Əliyev isə fevralın 13-də France 24 telekanalına müsahibəsində bildirib ki, Azərbaycanda saxlanılan erməni əsilli şəxslər ağır cinayətlərdə ittiham olunurlar və onların azadlığa buraxılması gündəmdə deyil. Prezident mövqeyini əsaslandırarkən İkinci Dünya müharibəsindən sonra keçirilmiş Nürnberq tribunalı məhkəməsini misal çəkib.

Əliyev həmçinin təsdiqləyib ki, ABŞ-ın vitse-prezidenti Ceyms Vens fevralın əvvəlində Bakıya səfəri zamanı saxlanılan ermənilərin azad edilməsi məsələsini qaldırıb.

Hazırda Azərbaycanda 19 erməni məhbusun saxlanıldığı bildirilir. Onların arasında Qarabağda fəaliyyət göstərmiş keçmiş separatçı rejimin liderləri də var. Həmin şəxslər 20-dən çox maddə, o cümlədən soyqırımı və terrorçuluq ittihamları üzrə mühakimə olunurlar.

Bu yaxınlarda Azərbaycan barələrində hökm çıxarılmış dörd erməni məhbusu – Vaqif Xaçaturyan, Gevorq Sujyan, David Davtyan və Vigen Eulcekciyanı Ermənistana təhvil verib.

Fevralın 5-də isə Qarabağda fəaliyyət göstərmiş keçmiş separatçı qurumun rəhbər şəxsləri və digər rəsmiləri barədə məhkəmə hökmləri elan olunub. Onlara 15 ildən başlayaraq ömürlük azadlıqdan məhrumetmə cəzaları verilib.

Təqsirləndirilən şəxslərin əksəriyyəti 2023-cü ilin sentyabrında Azərbaycanın Qarabağda keçirdiyi lokal hərbi əməliyyatlardan sonra, bölgədən erməni əhalinin çıxışı zamanı saxlanılıb.