Azərbaycan Respublikasının Cinayət Məcəlləsinin sülh və insanlıq əleyhinə cinayətlər, müharibə cinayətləri, terrorçuluq və terrorçuluğun maliyyələşdirilməsi ilə bağlı maddələri, eləcə də digər ağır cinayətlər üzrə təqsirləndirilən Ermənistan vətəndaşı Ruben Vardanyan barəsində yekun hökm elan olunub.

Bakı Hərbi Məhkəməsində hakim Zeynal Ağayevin sədrliyi ilə, hakimlər Camal Ramazanov və Anar Rzayevdən ibarət tərkibdə (ehtiyat hakim Günel Səmədova) keçirilən açıq məhkəmə iclasında hökm oxunub.

Məhkəmə prosesi zamanı təqsirləndirilən şəxs bildiyi dildə – rus dilində tərcüməçi ilə, həmçinin dövlət hesabına vəkillə təmin olunub. İclasda təqsirləndirilən şəxs və onun müdafiəçisi ilə yanaşı, zərərçəkmiş şəxslərin və onların hüquqi varislərinin bir qismi, nümayəndələri, dövlət ittihamını müdafiə edən prokurorlar, eləcə də Azərbaycan dövləti adından zərərçəkmiş qismində Nazirlər Kabineti Aparatının rəhbəri Rüfət Məmmədov iştirak edib.

Hökmə əsasən, Ruben Vardanyan qəti olaraq 20 il müddətinə azadlıqdan məhrumetmə cəzasına məhkum edilib.

Xatırladaq ki, məhkəmə iclasında dövlət ittihamçısı təqsirləndirilən şəxsə ömürlük azadlıqdan məhrumetmə cəzasının verilməsini təklif etmişdi.