Fevralın 26-da saat 17:00-da Azərbaycanın bütün ərazisində Xocalı soyqırımı qurbanlarının xatirəsi bir dəqiqəlik sükutla yad olunub.

Həmin anda paytaxtın küçələrində nəqliyyatın hərəkəti dayandırılıb, ölkənin şəhər və rayonlarında, kənd və qəsəbələrində, eləcə də xaricdəki diplomatik nümayəndəliklərdə Azərbaycanın Dövlət Bayrağı endirilib.

Bakının Xətai rayonunda faciə qurbanlarının xatirəsinə ucaldılmış abidə minlərlə sakin tərəfindən ziyarət olunub, şəhidlərin xatirəsi ehtiramla anılaraq abidə önünə əklillər və qərənfillər qoyulub. Respublikanın müxtəlif bölgələrində, dövlət qurumlarında, dini ibadət ocaqlarında və xarici ölkələrdə anım mərasimləri, yürüşlər və mədəni tədbirlər keçirilib.

Xocalı sakinlərinin müvəqqəti məskunlaşdıqları ərazilərdə soyqırımı şahidləri və həlak olanların ailə üzvləri ilə görüşlər təşkil olunub. Şuşa və Ağdam məscidlərində, həmçinin Xocalı, Xankəndi və digər azad edilmiş ərazilərdə də faciə qurbanlarının xatirəsi yad edilib.

Qeyd edək ki, 1992-ci il fevralın 25-dən 26-na keçən gecə Xocalı şəhərinə hücum nəticəsində 613 nəfər, o cümlədən 63 uşaq və 106 qadın qətlə yetirilib, yüzlərlə sakin əsir və girov götürülüb. Facənin qurbanları hər il fevralın 26-da ölkə üzrə anılır.