Yaxın Şərqdə, xüsusilə İran, İsrail və ABŞ arasında davam edən hərbi qarşıdurma artıq yalnız siyasi və hərbi deyil, həm də ekoloji təhlükələr baxımından ciddi narahatlıq doğurur.

Ekspertlər bildirir ki, hərbi əməliyyatlar zamanı enerji və sənaye obyektlərinin, xüsusilə neft infrastrukturlarının hədəfə alınması genişmiqyaslı çirklənməyə səbəb ola bilər. Bu isə təkcə münaqişə zonasını deyil, regionun digər ölkələrini də təsirləndirə bilər.

Ekoloq **Rövşən Abbasov**un sözlərinə görə, hərbi əməliyyatlar zamanı istifadə olunan raketlər və texnika atmosferə böyük miqdarda zərərli maddələr buraxır:

“Havaya yayılan kükürd dioksidi və azot oksidləri su buxarı ilə reaksiyaya girərək turşulu yağışların yaranmasına səbəb olur. Bu isə torpağın kimyəvi tərkibini dəyişdirir, bitkilərə zərər verir və su hövzələrində canlıların həyatını təhlükə altına qoyur”.

O qeyd edib ki, xüsusilə Fars körfəzi kimi həssas bölgələrdə neft obyektlərinə zərbələr dəniz mühiti üçün ciddi təhlükə yaradır. Neft sızmaları nəticəsində suyun səthində yaranan qat oksigen mübadiləsini azaldır və bu da balıqların, dəniz quşlarının və digər canlıların məhvinə səbəb ola bilər.

Ekspert vurğulayıb ki, bu tip çirklənmələr sərhəd tanımır:

“Atmosferə buraxılan zərərli maddələr küləklər vasitəsilə digər ölkələrə yayılır. Bu, transsərhəd çirklənmə adlanır və təsiri daha geniş coğrafiyada hiss olunur”.

Mütəxəssislərin fikrincə, münaqişənin uzanması halında bu çirklənmənin Cənubi Qafqaz regionuna, o cümlədən Azərbaycana da çatması ehtimalı var. Bu isə havanın keyfiyyətinin pisləşməsi, torpaq və su ehtiyatlarının zədələnməsi kimi riskləri artırır.

Beləliklə, Yaxın Şərqdə davam edən müharibə yalnız regional təhlükəsizlik deyil, həm də qlobal ekoloji balans üçün ciddi təhdid kimi qiymətləndirilir.