İçərişəhər Dövlət Tarix-Memarlıq Qoruğu İdarəsi (DTMQİ) İçərişəhər ərazisində qala divarının bir hissəsində baş vermiş qismən dağılma ilə bağlı operativ tədbirlərin görüldüyünü açıqlayıb.

Qurumun Mətbuat xidmətindən bildirilib ki, hadisədən dərhal sonra əraziyə yüksək ixtisaslı mütəxəssislər cəlb olunub və ilkin mərhələdə təcili konservasiya və sabitləşdirmə işlərinə başlanılıb. Bu tədbirlər zədələnmiş sahənin daha da deformasiyaya uğramasının qarşısını almağa və konstruksiyanın dayanıqlığını təmin etməyə yönəlib.

Məlumata görə, növbəti mərhələdə ərazidə geniş texniki və mühəndis-ekspertiza qiymətləndirilməsi aparılacaq. Qiymətləndirmənin nəticələrinə əsasən, qala divarının zədələnmiş hissəsinin elmi əsaslarla bərpası həyata keçiriləcək.

Qeyd olunub ki, son illər ərzində İçərişəhər ərazisində qala divarlarında mərhələli şəkildə bərpa və konservasiya tədbirləri aparılır və hazırda bu işlər İsmailiyyə Sarayına bitişik hissəni əhatə edir.

Bildirilib ki, aşınma 13 və 14 saylı bürclərin kəsişmə hissəsində baş verib və həmin ərazidə indiyədək bərpa işləri aparılmayıb. Hadisənin əsas səbəbi son günlər müşahidə olunan aramsız yağışlar nəticəsində yaranan rütubət və təbii eroziya prosesləri ilə əlaqələndirilir.

DTMQİ vurğulayıb ki, bərpa işləri beynəlxalq standartlara uyğun, yüksək dəqiqlik və həssaslıqla aparılacaq və məqsəd abidənin tarixi autentikliyini qorumaqla onun uzunmüddətli dayanıqlığını təmin etməkdir.