ABŞ-ın Vaşinqton şəhərindəki Milli Mall ərazisinin çəmənliyinə yazılan “86 47” rəqəmləri siyasi mübahisəyə səbəb olub. Naməlum şəxslər tərəfindən çəkilən bu dörd rəqəm ABŞ Prezidenti Donald Tramp və onun tərəfdarlarının diqqətini cəlb edib.

Hüquq-mühafizə orqanları hadisə ilə bağlı araşdırma aparır. İlkin məlumata görə, rəqəmlər çəmənliyi rəngsizləşdirən və geniş ərazidə ot örtüyünü məhv edən xüsusi maddə ilə yazılıb. Yazının yeri də diqqət çəkib: rəqəmlər Corc Vaşinqton abidəsindəki müşahidə kameralarından görünəcək şəkildə yerləşdirilib.

“86 47” nə deməkdir?

ABŞ-da “86” ifadəsi uzun illərdir müxtəlif mənalarda istifadə olunur. Bu kod ilk dəfə 1930-cu illərdə restoran sənayesində yayılıb. Restoran jarqonunda “86 etmək” nəyisə siyahıdan çıxarmaq, ləğv etmək, aradan qaldırmaq və ya kimisə uzaqlaşdırmaq mənasını verir.

Məsələn, aşpaz “86 the salmon” deyərsə, bu, həmin yeməyin artıq olmadığını və menyudan çıxarılmalı olduğunu bildirir.

Lakin siyasi mühitdə bu ifadəyə fərqli məna verilir. “47” rəqəmi isə Donald Trampa işarə edir, çünki o, ABŞ-ın 47-ci prezidenti kimi tanınır.

Beləliklə, Tramp əleyhdarları arasında “86 47” ifadəsi “47-ci prezidenti uzaqlaşdırmaq” mənasında siyasi şüar kimi istifadə olunur. Əvvəllər Trampın ilk prezidentliyi dövründə buna bənzər “86 45”, daha sonra isə prezident Co Baydenə qarşı “86 46” kimi ifadələr də istifadə edilib.

Tramp tərəfdarları bunu təhdid kimi qiymətləndirir

Mübahisənin əsas səbəbi “86 etmək” ifadəsinin bəzi hallarda daha sərt mənada — kimisə fiziki olaraq aradan götürmək və ya öldürmək kimi yozulmasıdır.

Tramp və onun tərəfdarları bu kodun potensial zorakılıq çağırışı ola biləcəyini iddia edirlər. ABŞ rəsmiləri isə həm federal mülkiyyətə ziyan vurulması, həm də mümkün təhlükə ehtimalını araşdırır.

Oxşar mübahisə daha əvvəl Federal Təhqiqatlar Bürosunun (FTB) keçmiş direktoru James Comey ilə bağlı da yaşanmışdı. O, sosial şəbəkədə 86 47 formasında düzülmüş dəniz qabıqlarının fotosunu paylaşmış, Tramp tərəfdarları isə bunu prezidentə qarşı gizli mesaj kimi qiymətləndirmişdilər. Komi isə bunun siyasi təhdid olmadığını və rəqəmlərin belə yozula biləcəyini bilmədiyini bildirmişdi.

ABŞ qanunlarına görə “86 47” qadağan olunmayıb

ABŞ-da “86 47” kombinasiyası özü-özlüyündə qanunsuz simvol hesab edilmir. Federal məhkəmə daha əvvəl bu ifadənin siyasi etiraz formasında istifadəsini qorunan fikir azadlığı çərçivəsində qiymətləndirib.

Məhkəmə qeyd edib ki, “86” ifadəsinin ən geniş yayılmış mənası “uzaqlaşdırmaq” və ya “ləğv etmək”dir, öldürmək deyil.

Bununla belə, Milli Mall ərazisində çəmənliyə yazılması ayrıca hüquqi məsələdir, çünki bu, federal əmlaka zərər vurma kimi qiymətləndirilə bilər.

Hazırda ABŞ rəsmiləri həm vandalizm faktını, həm də bu mesajın prezident üçün real təhlükə yaradıb-yaratmadığını araşdırır.