Oktyabrın 1-də Bakı Ağır Cinayətlər Məhkəməsində Siyasi Menecment İnstitutunun həbsdə olan direktoru Azər Qasımlının işi üzrə növbəti proses keçirilib.

Məhkəmədə hakim Telman Hüseynov və Qasımlının vəkili Rövşanə Rəhimova arasında mübahisə yaşanıb. Vəkil politoloqun şüşə kabinədən çıxarılıb yanında əyləşdirilməsini tələb edib, hakim isə vəkili Vəkillər Kollegiyasına şikayət etməklə hədələyib.

A.Qasımlı ifadəsində qarşı tərəflə mübahisəsinin əsas səbəbini kriptovalyuta (Bitcoin) sərmayəsi ilə bağlı mülki məsələ kimi izah edib və ona verilən ittihamı “şər-böhtan” adlandırıb. Politoloq həbsinin siyasi motivli olduğunu bildirib.

O həmçinin həbsindən əvvəl ölkədən çıxışına qadağa qoyulduğunu, Almaniyaya getmək istərkən hava limanında saxlanıldığını xatırladıb.

A.Qasımlının məhkəməsi oktyabrın 8-də davam edəcək.