Xamenei Səudiyyə kralının “qızıl məsləhəti”ni rədd etmişdi – ABŞ-la nüvə razılaşması gündəmdə idi

İki ay əvvəl İranın ali lideri Ayətullah Əli Xamenei Səudiyyə Ərəbistanı kralı Salman bin Əbdüləzizin göndərdiyi xüsusi mesajı – adlandırıldığı kimi “qızıl məsləhət”i – rədd edib.

Sözügedən mesaj kral Salman tərəfindən oğlu, Səudiyyə Ərəbistanının müdafiə naziri şahzadə Xalid bin Salman vasitəsilə şəxsən Tehrana çatdırılıb. Məsləhətin əsas məqsədi İran rəhbərliyini ABŞ-ın sabiq prezidenti Donald Tramp tərəfindən irəli sürülən yeni nüvə razılaşması təklifini ciddi şəkildə müzakirə etməyə razı salmaq olub.

Səudiyyə tərəfinin mövqeyinə görə, bu təklifin qəbul edilməsi bölgədə İsraillə baş verə biləcək genişmiqyaslı bir müharibənin qarşısını almağın yeganə diplomatik yolu hesab olunurdu. Lakin Xamenei bu təklifi qəti şəkildə rədd edərək, ABŞ-la yeni bir razılaşmanın İranın milli maraqlarına zidd olduğunu bəyan edib.

Qeyd edək ki, bölgədəki gərginlik fonunda Səudiyyə Ərəbistanı və digər ərəb ölkələri Vaşinqtonla Tehran arasında əlaqələrin sabitləşməsi üçün vasitəçilik cəhdlərini davam etdirirlər. İran isə bu təkliflərə ehtiyatla yanaşır və mövcud nüvə proqramına qarşı təzyiqlərin beynəlxalq hüquqa zidd olduğunu bildirir.