İran Silahlı Qüvvələrinin Baş Qərargah rəisi general-mayor Əbdülrəhim Musəvi İsrailə qarşı sərt bəyanatla çıxış edib. O, İsrailin İrana qarşı hücumlarını pisləyərək, cavab əməliyyatlarının yaxın vaxtlarda həyata keçiriləcəyini bildirib.

Musəvi deyib ki, indiyədək həyata keçirilən əməliyyatlar sadəcə çəkindirmə xarakteri daşıyıb və əsas cəza əməliyyatları qarşıdadır: “Bu rejim hərbi məqsədlər pərdəsi altında İran xalqına hücum edib. İran Yayım Korporasiyasını hədəf almaqla onlar həqiqətin səsini boğmağa çalışırlar”.

O, İran xalqının bu təcavüzə təslim olmayacağını və sionist rejimin cavab verməyə məcbur ediləcəyini vurğulayıb: “Komandirlərimizin, alimlərimizin və həmvətənlərimizin şəhadəti silahlı qüvvələrin cəza əmrini yerinə yetirməkdə qətiyyətini daha da artıracaq”.

Musəvi həmçinin İsrailin həssas və həyati əhəmiyyətli hədəflərinə indiyədək ciddi zərbələr endirildiyini deyib və işğal olunmuş ərazilərdə yaşayanlara səslənərək xəbərdarlıq edib: “Təl-Əviv və Hayfanın sakinləri canlarını xilas etmək üçün bu əraziləri tərk etsinlər. Onlar Netanyahunun heyvani istəklərinin qurbanına çevrilməsinlər”.

General Musəvi sonda beynəlxalq ictimaiyyətə səslənərək İran xalqının şəhidlərin qanının intiqamını alacağına əminlik ifadə edib.