İranda İsrailin xeyrinə casusluqda təqsirli bilinən daha bir şəxs edam edilib. İranın rəsmi KİV-lərinin məlumatına görə, edam olunan şəxs İsmayıl Fikri olub və onun İsrailin kəşfiyyat xidməti “Mossad”la əməkdaşlıq etdiyi iddia edilir.

İran Məhkəmə Sisteminin mətbuat xidmətindən verilən açıqlamaya əsasən, Fikri ölkə ilə bağlı gizli məlumatları pul müqabilində İsrail tərəfinə ötürüb. Bildirilir ki, o, “Mossad”ın iki əməkdaşı ilə birbaşa əlaqə quraraq İran ərazisində təxribat və kəşfiyyat əməliyyatlarının həyata keçirilməsinə yardım edib.

“İşin materiallarına əsasən, Fikri maliyyə qarşılığında İranla bağlı məxfi məlumatları ölkənin düşməni olan xarici qüvvələrlə bölüşüb. Onun İsrailə ötürdüyü məlumatlar ciddi təhlükəsizlik risklərinə yol açıb”, – deyə bəyanatda qeyd olunub.

İsmayıl Fikri barəsində çıxarılan hökm asılaraq edam edilmə şəklində icra olunub.

Bu, son həftələrdə İsrail üçün casusluq ittihamı ilə İranda həyata keçirilən üçüncü edamdır. İran hakimiyyəti ölkə daxilində xarici kəşfiyyat orqanları ilə əlaqəli fəaliyyət göstərən şəxslərə qarşı mübarizəni gücləndirdiyini bildirir.