ABŞ ilə İran arasında planlaşdırılan danışıqlar baş tutmayıb və tərəflər arasında fikir ayrılıqları dərinləşib.

Məlumata görə, İran danışıqların məkanının Oman-a dəyişdirilməsini və müzakirələrin yalnız nüvə proqramı ilə məhdudlaşdırılmasını tələb edib. Lakin ABŞ bu şərtlərlə razılaşmayıb. Bu barədə Axios nəşri məlumat yayıb.

ABŞ rəsmisinin sözlərinə görə, Vaşinqton tərəfi danışıqların əvvəlcədən planlaşdırıldığı kimi keçirilməsində israr edib: “Biz onlara dedik ki, ya bu formatda danışıqlar olacaq, ya da heç olmayacaq. Onlar isə ‘o zaman heç olmasın’ cavabını verdilər.”

ABŞ tərəfi həmçinin bildirib ki, İran raket proqramını da müzakirələrə daxil edərsə və danışıqlar İstanbul şəhərində keçirilərsə, dialoqa hazırdır.

Digər tərəfdən, Reuters agentliyinə danışan ABŞ rəsmisi qeyd edib ki, Vaşinqton İranın danışıqlardan imtina edəcəyini gözləmirdi.

Məlumata əsasən, ABŞ-ın xüsusi nümayəndəsi Steve Witkoff İranın danışıqları ləğv etməsindən sonra Yaxın Şərqi tərk edərək Vaşinqton şəhərinə qayıdacaq.

Danışıqların pozulması fonunda regionda gərginliyin artdığı və mümkün hərbi eskalasiya ehtimalının yüksəldiyi bildirilir.