Azərbaycanın xarici işlər naziri Ceyhun Bayramov Malayziyanın Azərbaycana yeni təyin olunmuş səfiri Aznifah İsnariah Binti Abdul Ghanini qəbul edib.

Azərbaycan Xarici İşlər Nazirliyinin məlumatına görə, görüş zamanı səfir etimadnaməsinin surətini Ceyhun Bayramova təqdim edib. Nazir onu yeni təyinatı münasibətilə təbrik edərək diplomatik fəaliyyətində uğurlar arzulayıb.

Görüşdə Azərbaycan və Malayziya arasında ikitərəfli münasibətlərin hazırkı vəziyyəti və gələcək inkişaf perspektivləri müzakirə olunub. Tərəflər iqtisadiyyat və ticarət, turizm, təhsil və digər sahələrdə əməkdaşlığın genişləndirilməsi imkanları ətrafında fikir mübadiləsi aparıblar.

Danışıqlar zamanı Azərbaycanın tranzit və logistika imkanları, eləcə də enerji təhlükəsizliyində oynadığı rol da müzakirə mövzusu olub.

Ceyhun Bayramov BMT, İslam Əməkdaşlıq Təşkilatı, Qoşulmama Hərəkatı və D-8 çərçivəsində Azərbaycanla Malayziyanın qarşılıqlı dəstəyinin əhəmiyyətini vurğulayıb.

Görüşdə, həmçinin bu il Bakıda keçirilməsi nəzərdə tutulan Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) Zirvə Görüşünə hazırlıq məsələlərinə toxunulub. Azərbaycanın 2027-ci ildə İslam Əməkdaşlıq Təşkilatının Zirvə Görüşünə ev sahibliyi edəcəyi də diqqətə çatdırılıb.

XİN rəhbəri Malayziya səfirinə regiondakı mövcud vəziyyət, post-münaqişə dövründə aparılan bərpa və yenidənqurma işləri barədə məlumat verib.

Aznifah İsnariah Binti Abdul Ghani isə Azərbaycandakı diplomatik fəaliyyəti dövründə iki ölkə arasındakı dostluq münasibətlərinin möhkəmləndirilməsi, ikitərəfli və çoxtərəfli əməkdaşlığın genişləndirilməsi üçün səylər göstərəcəyini bildirib.

Görüşdə qarşılıqlı maraq doğuran digər regional və beynəlxalq məsələlər də müzakirə olunub.