USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
“Toplum TV işi”: Ələsgər Məmmədlinin ev dustaqlığı ilə bağlı vəsatəti yenidən rədd edildi
Avqustun 4-də Bakı Ağır Cinayətlər Məhkəməsində “Toplum TV işi” üzrə növbəti proses keçirilib. Hakim Azər Tağıyevin sədrliyi ilə baş tutan iclasda Toplum TV-nin həmtəsisçisi, hüquqşünas Ələsgər Məmmədlinin vəkili onun səhhəti ilə bağlı ev dustaqlığına buraxılması üçün yenidən vəsatət qaldırıb.
Bu dəfə müdafiə tərəfi qalxanvari vəzidə xərçəng riski daşıyan düyün, qaraciyər, böyrək, pankreas və prostatda ciddi problemlər, şəkərli diabet və yüksək təzyiq kimi xəstəlikləri təsdiqləyən tibbi arayış təqdim edib. Lakin hakimlər müşavirədən sonra vəsatəti təmin etməyib.
Ə.Məmmədli çıxışında səhhətinin günahsızlığını müdafiə etməyə mane olduğunu vurğulayıb və məhkəmə heyətinə müraciətlə bildirib:
“Heç olmasa, siz məzuniyyətdəykən həbsim ev dustaqlığı ilə əvəzlənsə, əməliyyat oluna bilərəm. Bu, həm də vicdan məsələsidir”.
Dövlət ittihamçısı Rauf Malışov Ə.Məmmədlinin müalicə müəssisəsinə köçürülməsinə etiraz etməyəcəyini bildirib, lakin məhkəmə qərarında bu təklif də nəzərə alınmayıb.
Ə.Məmmədli həmçinin avtomobilinin üzərinə qoyulmuş həbsə etiraz edib. O bildirib ki, avtomobil bir ildən çoxdur harada saxlanıldığı bilinmir, ailəsi bu müddət ərzində taksiyə 2000 manatdan çox pul xərcləyib, bu da onların büdcəsinə ağır zərbə vurub. Bu vəsatət də təmin olunmayıb.
Növbəti məhkəmə prosesi sentyabrın 8-nə təyin olunub.
“Toplum TV işi” üzrə ümumilikdə 10 nəfərə cinayət işi açılıb. Onlar əvvəlcə qaçaqmalçılıq, sonradan isə ağırlaşdırılmış ittihamlarla suçlanıblar. Təqsirləndirilən şəxslər ittihamları qəbul etmir, həbslərinin siyasi sifariş əsasında baş verdiyini bildirirlər.
