USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Qəzzada yarım milyon insan aclıqdan əziyyət çəkir
Dünyada aclığın monitorinqi ilə məşğul olan “IPC” beynəlxalq təsnifat sistemi avqustun 22-də Qəzza zolağında aclıq mərhələsinin başladığını elan edib.
Məlumata görə, hazırda zolağın əhalisinin təxminən dörddə biri – 514 min nəfər aclıq yaşayır. Əgər vəziyyət dəyişməzsə, bu rəqəmin sentyabrın sonuna qədər 641 min nəfərə yüksələcəyi proqnozlaşdırılır. Bu, “IPC”-nin Qəzzadakı vəziyyətlə bağlı ilk belə qiymətləndirməsidir.
Aclıqdan əziyyət çəkənlərin təxminən 280 min nəfəri Qəzzanın şimal bölgəsində, o cümlədən Qəzza şəhərində yaşayır. Digərləri isə əsasən Deyr əl-Bələh (mərkəz) və Xan Yunis (cənub) bölgələrindədir.
İsrail açıqlamanı rədd edərək hesabatı “yalan və qərəzli” adlandırıb, məlumatların isə HƏMAS-dan qaynaqlandığını bildirib.
“IPC” kriteriyalarına görə, bir bölgənin aclıq vəziyyətində təsnif olunması üçün əhalinin azı 20%-i kəskin ərzaq çatışmazlığı çəkməli, uşaqların ən azı üçdə biri ağır qida çatışmazlığı ilə üzləşməli, hər 10 min nəfərə gündə iki ölüm faktı (aclıq və ya qida çatışmazlığı səbəbilə) qeydə alınmalıdır.
2023-cü ilin oktyabrında İsrailin Qəzzada hərbi əməliyyatlara başlamasından sonra bölgə blokadadadır və yalnız məhdud miqdarda ərzaq daxil olur. Qəzza səhiyyə rəsmilərinin məlumatına görə, indiyədək ən az 271 nəfər aclıqdan ölüb, onların 112-si uşaqdır.
Ümumilikdə isə, İsrail hücumları nəticəsində Qəzzada 60 mindən çox insan həlak olub, ölənlər arasında 18 mindən çox uşaq var.
