III Respublika Platformasının qurucu heyət üzvü, siyasətçi Ruslan İzzətli sentyabrın 22-də Bakı Ağır Cinayətlər Məhkəməsində “Toplum TV işi” üzrə keçirilən məhkəmə prosesində ifadə verib.

O, həbsi siyasi sifariş adlandıraraq bildirib ki, hakimiyyət uzun illərdir ona qarşı təzyiq göstərir:

“Əgər sovet dövründəki kimi ‘Sibir düşərgələri’ mövcud olsaydı, məni ora da sürgün edərdilər. Hakimiyyət tənqidçilərinə qarşı stalinizm metodları ilə davranır.”

İzzətli qeyd edib ki, 2020-ci il parlament seçkilərində aktiv iştirakı və seçki saxtakarlıqlarının ifşa olunmasında rolu ona qarşı təzyiqlərin əsas səbəblərindən olub. Onun sözlərinə görə, məhz buna görə sağlamlıq imkanlarının məhdud olmasına baxmayaraq hərbi xidmətə göndərilib.

Siyasətçi ittiham aktını tamamilə saxta adlandıraraq bildirib ki, göstərilən tarixlərdə hərbi xidmətdə olub, evində tapıldığı deyilən 4 800 avronun isə polis əməkdaşları tərəfindən qoyulduğunu deyib.

Ruslan İzzətli həmçinin hakimiyyətin nəzarətində olan media qurumlarını təqsirsizlik prezumpsiyasını pozmaqda ittiham edib:

“Stalin NKVD əməkdaşlarına deyirdi ki, məhbusları minin, etiraf etməyincə düşməyin. Azərbaycan hakimiyyəti də tənqidçilərinə qarşı həmin metoddan istifadə edir.”

O, Toplum TV, FaktYoxla və Demokratik Təşəbbüslər İnstitutuna qarşı repressiyaları siyasi qərar adlandıraraq bunun III Respublika Platformasının yaranması ilə bağlı olduğunu vurğulayıb.

Hakimiyyəti Pol Pot rejimi ilə müqayisə edən siyasətçi əlavə edib ki, iqtidar gənclərdən və açıq tənqiddən qorxur:

“Xalqın sərvətlərini talamaq üçün qorxu siyasətindən istifadə edirlər. Gənc nəsli isə keçmişin mifləri ilə aldatmaq mümkün deyil. Ona görə də xalqla yalnız hüquq-mühafizə orqanlarının dili ilə danışırlar.”

Ruslan İzzətli çıxışını belə tamamlayıb:

“Repressiyalar xalqın müqavimət hissini boğmaq üçündür. Amma biz bu kin və nifrət siyasətinə birlikdə ‘dur’ deməliyik. Bu prosesdə seyirçi yox, iştirakçı olmaq lazımdır. Məmləkətin azadlığı hər birimizin addımından asılıdır.”