USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
“Abzas” jurnalistləri hələ də cəzaçəkmə müəssisəsinə köçürülməyib
“Abzas Media işi” üzrə barələrində hökm çıxarılan jurnalistlər hələ də Bakıdan təxminən 70 kilometr aralıda yerləşən Umbakı qəsəbəsindəki təcridxanada saxlanılır.
İyunun 20-də Bakı Ağır Cinayətlər Məhkəməsi jurnalistlər barədə hökm elan etsə də, onların hansı cəzaçəkmə müəssisəsinə köçürülməsi ilə bağlı xüsusi qərar verilməyib. Buna baxmayaraq, kişi jurnalistlər iyunun 26-da Bakı İstintaq Təcridxanasından xəbərsiz şəkildə Umbakı təcridxanasına aparılıb.
Müdafiə tərəfi Penitensiar Xidmətin bu addımını qanunsuz adlandırıb. İyulun 3-də məhkəmə Abzas Medianın direktoru Ülvi Həsənlinin yenidən Bakı İstintaq Təcridxanasına qaytarılması barədə qərar çıxarsa da, bu qərar icra olunmayıb.
Jurnalistlərin yaxınları bildirirlər ki, Umbakı təcridxanasının şəhərdən uzaqlığı ailə üzvləri və vəkillərin görüşlərini çətinləşdirir. Burada yalnız şüşə arxasından görüş imkanı var, canlı görüşlər isə təmin edilmir.
Azadlıq Radiosunun həbsdə olan jurnalisti və iqtisadçı Fərid Mehralızadənin sözlərinə görə, adətən məhbuslar hökm elan olunduqdan sonrakı həftə cəzaçəkmə müəssisələrinə köçürülür:
“Amma Apellyasiya Məhkəməsinin qərarı qüvvədə saxlamasına baxmayaraq, bizi hələ də heç yerə köçürməyiblər”, – deyə o, yaxınları vasitəsilə bildirib.
Sentyabrın 9-da Bakı Apellyasiya Məhkəməsi “Abzas Media işi” üzrə hökmü qüvvədə saxlayıb.
Qərara əsasən, Abzas Medianın direktoru Ülvi Həsənli, baş redaktor Sevinc Vaqifqızı, araşdırmaçı jurnalist Hafiz Babalı və Azadlıq Radiosunun jurnalisti Fərid Mehralızadə 9 il, jurnalistlər Nərgiz Absalamova və Elnarə Qasımova 8 il, Abzas Medianın koordinatoru Məhəmməd Kekalov isə 7 il 6 ay müddətinə azadlıqdan məhrum edilib.
Onlar qaçaqmalçılıq da daxil olmaqla bir neçə maddə ilə ittiham olunublar. Lakin həm jurnalistlər, həm də müdafiəçiləri ittihamların əsassız olduğunu və istintaqın sübut təqdim etmədiyini bildirirlər.
