Sentyabrın 22-də Bakı Ağır Cinayətlər Məhkəməsində Seçkilərin Monitorinqi və Demokratiyanın Tədrisi Mərkəzinin (SMDTM) sədri Anar Məmmədlinin işi üzrə növbəti məhkəmə iclası keçirilib.

“Gözətçi”nin məlumatına görə, müdafiə çıxışı edən A.Məmmədli irəli sürülmüş ittihamları əsassız və siyasi motivli adlandıraraq, prosesi “rejimin qurduğu siyasi tamaşa” kimi dəyərləndirib.

2013-cü ildə də həbs olunan hüquq müdafiəçisi Avropa İnsan Hüquqları Məhkəməsinin (AİHM) 2018-ci ildə çıxardığı qərarı xatırladaraq, həmin vaxt onun həbsinin əsassız və siyasi motivli hesab edildiyini bildirib. A.Məmmədli həmin qərarın nüsxəsini məhkəməyə təqdim edib.

O qeyd edib ki, bu dəfə irəli sürülən ittihamlar da əvvəlkilərdən fərqlənmir. Həmçinin ittiham aktında onun “əvvəllər məhkum edilmiş, məhkumluğu ödənilməmiş” şəxs kimi təqdim olunmasını qanunsuz adlandırıb:
“AİHM-in qərarına görə, əvvəlki məhkumluğum hüquqi nəticələrini itirməli və Ali Məhkəmə bəraət qərarı verməli idi. Dövlət mənə təzminat ödəyib, amma hələ də bəraət verməyib”.

Məmmədli ittiham aktının absurd şəkildə tərtib olunduğunu vurğulayıb. Onun sözlərinə görə, sənəddə əsas ittiham cəmi üç cümlədə ifadə olunub: birincisi – 224 söz, ikincisi – 554 söz, üçüncüsü isə 12 səhifədən ibarət 6,370 sözdür.
“Əgər 2013-cü ildə bir səhifəlik uzun cümlə ‘ittiham’ sayılırdısa, indi artıq ‘12 səhifəlik cümlə’ yazmaq təcrübəsi inkişaf etdirilib. Bu, yalnız repressiv praktikanın davamlılığını deyil, həm də bu repressiyanı həyata keçirənlərin məntiqsizliyinin böyüdüyünü göstərir”, – deyə o bildirib.

SMDTM rəhbəri həmçinin qeyd edib ki, təşkilat qeydiyyata alınmaq üçün bütün hüquqi yolları sınayıb, AİHM-də qalib gəlib, lakin Azərbaycan dövləti qəsdən qeydiyyatı təmin etməyib:
“Belə olan halda qeydiyyatsızlığın məsuliyyəti bizə yox, dövlətə aiddir”.

Məmmədli çıxışında ittihamları sovet repressiyalarına bənzədib:
“Necə ki, 1964-cü ildə Leninqradda Dzerjinski Rayon Məhkəməsi şair İosif Brodskini ‘müftəxorluq’ ittihamı ilə mühakimə etmişdi, indi də SMDTM-nin qeydiyyatsız fəaliyyətini cinayət kimi təqdim etməklə, Azərbaycan istintaqı sovet müstəntiqlərinin repressiv düşüncəsini təkrar edir”.

Anar Məmmədlinin müdafiə çıxışı sentyabrın 29-da saat 15:45-də Bakı Ağır Cinayətlər Məhkəməsində davam etdiriləcək.

Xatırladaq ki, o, 2024-cü il aprelin 29-da saxlanılıb və Cinayət Məcəlləsinin “qabaqcadan əlbir olan bir qrup şəxs tərəfindən qaçaqmalçılıq” maddəsi ilə ittiham olunur. Özünü təqsirli bilmir. Beynəlxalq insan haqları təşkilatları A.Məmmədlini siyasi məhbus hesab edir.