Azərbaycanın neft gəlirlərindən əldə olunan milyardlarla vəsaitin illərlə talan edilməsinə dair ittihamların fonunda indi paytaxt üçün xarici maliyyə institutlarından kiçik qrantların alınması diqqət çəkir.

Dünya Bankı yaydığı məlumatda bildirib ki, Azərbaycana “Yaşanılabilən Bakı” layihəsi çərçivəsində növbəti maliyyə dəstəyi ayrılıb. Bu dəfə söhbət cəmi 500 min ABŞ dolları həcmində qrantdan gedir.

Layihənin məqsədi

Qrant vəsaiti Abşeron yarımadasında yerləşən və ekoloji problemləri ilə tanınan Zığ, Xocasən və Böyükşor göllərinin bərpası və ətraf ərazilərin inkişafı ilə bağlı texniki işlərə yönəldiləcək.

Layihə çərçivəsində:
• mövcud texniki-iqtisadi əsaslandırmalar yenilənəcək,
• müasir texniki layihə sənədləri hazırlanacaq,
• bu işlər üçün məsləhət xidmətləri cəlb olunacaq.

Dünya Bankı bildirib ki, göllərə dair texniki sənədlər illər əvvəl hazırlandığına görə, onların yenidən işlənməsi zəruridir.

İşlərə noyabrda başlanacaq

Planlara əsasən, layihə üzrə işlər 2025-ci ilin noyabr ayından etibarən həyata keçiriləcək. Texniki-iqtisadi əsaslandırmaların yenilənməsi və məsləhət xidmətlərinin göstərilməsi təqribən 500 min ABŞ dollarına başa gələcək.

İctimai reaksiyalar

Məsələ sosial şəbəkələrdə və ekspert dairələrində müzakirələrə səbəb olub. Tənqidçilər qeyd edirlər ki, Azərbaycan uzun illərdir neft gəlirlərindən milyardlarla dollar qazanmasına baxmayaraq, ekoloji problemlərin həlli üçün belə kiçik xarici qrantlara möhtac qalması hökumətin maliyyə idarəçiliyində ciddi suallar doğurur.