Ötən həftə Bakı şəhəri Səbail Rayon Məhkəməsi SOCAR-ın rəhbər vəzifələrində çalışmış, neft maqnatı Adnan Əhmədzadə barəsində 4 aylıq həbs qətimkan tədbiri seçib. Dövlət Təhlükəsizliyi Xidmətinin (DTX) apardığı cinayət işi çərçivəsində Əhmədzadə iqtisadi təhlükəsizliyə qarşı təxribat və xüsusilə külli miqdarda mənimsəmədə ittiham olunur.

Adnan Əhmədzadə həm Azərbaycan, həm də xarici mediada bahalı və lüks həyat tərzi ilə tanınıb. Onun və həyat yoldaşı Gülsəfa Cəfərovanın sosial şəbəkələrdə paylaşdıqları fotolar və videolar uzun müddət müzakirə mövzusu olub. Lakin Əhmədzadənin həbsindən sonra həyat yoldaşı sosial mediada ərinə aid bütün materialları silib.



Buna baxmayaraq, bəzi görüntülər digər istifadəçilərin hesablarında qalmaqdadır. Meydan TV-nin araşdırmasına görə, həmin fotolardan birində Gülsəfa Cəfərovanın taxdığı zinət əşyasının “Bulgari Serpenti Diamond” kolleksiyasına aid olduğu və 18 karatlıq boyunbağının dəyərinin 490 min ABŞ dolları olduğu məlum olub.

İttiham olunan neft maqnatının Azərbaycan, Türkiyə, Malta, İngiltərə, Dubay və Lüksemburqda bir neçə şirkəti mövcuddur. Bu şirkətlərin əksəriyyəti neft-qaz sektoru ilə bağlıdır.

Araşdırmaçı jurnalistlər iddia edirlər ki, Əhmədzadə ailəsinin sərvəti Azərbaycanın neft gəlirlərindən əldə olunan qeyri-qanuni vəsait hesabına formalaşıb.