İqtisadi təhlükəsizliyə qarşı təxribat və xüsusilə külli miqdarda mənimsəmə ittihamı ilə barəsində cinayət işi aparılan iş adamı Adnan Əhmədzadənin həbsi ilə bağlı məhkəmə qərarı qüvvədə qalıb.

Məlumata görə, Adnan Əhmədzadə barəsində seçilmiş həbs qətimkan tədbirinə qarşı apellyasiya şikayəti verməyib. Qanunvericiliyə əsasən, belə qərardan şikayət 3 gün ərzində yuxarı instansiya məhkəməsinə təqdim edilə bilərdi. Lakin Əhmədzadənin həbsi üzərindən dörd gün keçib və bu müddət ərzində nə özü, nə də vəkili şikayət etməyib.

Onun vəkili Şaiq Mirzəyev də məlumatı təsdiqləyərək bildirib:
“Hazırkı mərhələdə apellyasiya şikayəti verməyi zəruri hesab etmədik. İlk 4 ayda aktiv istintaq hərəkətləri aparılacaq. Bu səbəbdən hələ ki gözləməyi məqsədəuyğun saydıq. Gələcəkdə məsləhətləşmələrdən sonra, səhhəti və digər amilləri nəzərə alaraq məhkəməyə müraciət edə bilərik”.

Ekspertlərin fikrincə, Adnan Əhmədzadənin apellyasiya verməkdən imtina etməsi onun Dövlət Təhlükəsizliyi Xidmətinin (DTX) təqdim etdiyi ilkin sübutlarla tanış olması və şikayətin real nəticə verməyəcəyini düşünməsi ilə bağlıdır.

Hazırda istintaq davam edir və iş adamının fəaliyyətinə dair əlavə epizodların da araşdırıldığı bildirilir.