Babək rayonunun Nehrəm qəsəbə sakini, İkinci Qarabağ müharibəsinin iştirakçısı, hərbçi Vüsal Məhərrəm oğlu Əliyevin intihar etdiyi bildirilir.

Hadisə barədə məlumatı yerli media yayıb. Mərhumun atası Məhərrəm Əliyev bildirib ki, oğlu müharibədən sonra səhhətində ciddi problemlərlə üzləşmiş, bir neçə dəfə öz hesabına müalicə olunmuşdu.

“Öz gücümlə bir neçə dəfə müalicə etdirdim. Sonralar tez-tez təlimdə olduğu üçün müalicəni davam etdirə bilmədi. Hadisədən təxminən 10 gün əvvəl başının ağrıdığını deyirdi. Tez-tez yuxudan dik atılırdı. Hərbi hospitalda yoxlandı, həkimlər dərman yazmışdılar, dedilər 10 gün sonra yenidən gələrsən. Amma qismət olmadı,” – deyə atası bildirib.

Onun sözlərinə görə, Vüsal son vaxtlar əsəbi olur, yuxusuzluqdan və boğulma hissindən şikayətlənirdi:
“Deyirdi, boğuluram. Tez-tez yuxuda döyüş yoldaşlarını gördüyünü deyirdi. “N” saylı hərbi hissədə xüsusi təyinatlı kimi xidmət edirdi. Çox sirr saxlayan adam idi.”

Vüsal Əliyev 44 günlük müharibədə iştirakına görə bir neçə medalla təltif edilib. O, “Vətən uğrunda”, “Vətən müharibəsi iştirakçısı”, “Füzulinin azad olunmasına görə”, “Xocavəndin azad edilməsinə görə” və “Şuşanın azad edilməsinə görə” medallarına layiq görülüb.

Mərhum Şuşa döyüşlərində qəlpə yarası almış, müharibədən sonra da orduda müddətdən artıq həqiqi xidmət hərbi qulluqçusu kimi fəaliyyətini davam etdirirmiş. Onun hərbi rütbəsi çavuş olub.