Azərbaycan Daxili İşlər Nazirliyi “Sputnik Azərbaycan” media qurumunun Bakı ofisində əməliyyat aparıldığını təsdiqləyib.

Məlumatı DİN-in mətbuat xidməti yayıb. Əməliyyatın detalları açıqlanmasa da, bu addım Rusiya və Azərbaycan arasında son zamanlar yaşanan diplomatik gərginlik fonunda baş verib.

“Sputnik Azərbaycan” Rusiyanın dövlətə məxsus “Rossiya Seqodnya” media holdinqinə daxildir və 2015-ci ilin mayından Azərbaycanda fəaliyyət göstərirdi. Portal yerli və beynəlxalq xəbərləri Azərbaycan və rus dillərində yayımlayırdı.

2025-ci ilin fevralında Azərbaycan Xarici İşlər Nazirliyi “Sputnik Azərbaycan”ın nümayəndəliyinin ləğv edildiyini rəsmən açıqlamışdı. XİN bildirmişdi ki, bundan sonra qurum ölkədə yalnız bir müxbir vasitəsilə fəaliyyət göstərə bilər.

Hazırda yayılan məlumata görə, ofisdə aparılan axtarış əməliyyatları 2000-ci illərin əvvəllərində törədilmiş bəzi qətllərlə bağlı Rusiya hüquq-mühafizə orqanlarının Yekaterinburqda azərbaycanlı diaspor nümayəndələrini kütləvi şəkildə saxlamasından sonra baş verən gərginliklə əlaqələndirilir.

Rusiya tərəfi, xüsusilə Kreml, bu hadisələrə reaksiya verərək, Azərbaycanın qəbul etdiyi son qərarlardan “təəssüfləndiklərini” bildirib və iki ölkə arasında münasibətlərin inkişafında maraqlı olduqlarını vurğulayıb.

“Sputnik Azərbaycan” -nın bir neçə əməkdaşı saxlanılıb.