Azərbaycanda həbsdə olan Qarabağdakı separatçıların keçmiş “dövlət naziri” Ruben Vardanyan məhkəmə prosesində öz vəkilindən imtina edib.

“Qafqazinfo”nun məlumatına görə, oktyabrın 21-də Bakı Hərbi Məhkəməsində hakim Zeynal Ağayevin sədrliyi ilə keçirilən iclasda Ruben Vardanyan məhkəməyə müraciət edərək vəkili Avraam Bermanla konfidensial görüşmək istədiyini bildirib. Fasilədən sonra o, Bermandan imtina etdiyini açıqlayıb.

Vardanyan bu qərarını məhkəmə prosesindən ümumi narazılığı ilə əsaslandırıb. Müdafiəçi Avraam Berman isə vəsatətin təmin olunub-olunmamasını məhkəmənin mülahizəsinə buraxdığını qeyd edib.

Baş prokurorun böyük köməkçisi Vüsal Əliyev vurğulayıb ki, təqsirləndirilən şəxsin müdafiəçidən imtina etmək hüququ var, lakin qanunvericiliyə əsasən, o, ümumiyyətlə müdafiəçisiz qala bilməz.

“Ruben Vardanyan öz vəkilindən imtina edirsə, yeni vəkillə müqavilə bağlamalı, yaxud dövlət tərəfindən ona müdafiəçi təyin edilməlidir”, – dövlət ittihamçısı bildirib.

Vardanyan bildirib ki, başqa vəkillə müqaviləsi yoxdur və dövlət tərəfindən müdafiəçi təyin olunmasına etiraz etmir.

Məhkəmə onun müdafiəçisi Avraam Bermandan imtinasını qəbul edib və dövlət hesabına yeni müdafiəçi təyin edilməsi üçün qərarı Vəkillər Kollegiyasına göndərib.

Qeyd edək ki, bu ilin fevralında keçirilən iclasda Ruben Vardanyan əksinə, dövlət tərəfindən təyin olunmuş vəkildən imtina etmiş və yalnız öz vəkili ilə müdafiə olunmaq istəmişdi.

Hazırda o, Bakı Hərbi Məhkəməsində təqsirləndirilən şəxs qismində təkbaşına mühakimə olunur.
Ona qarşı Azərbaycan Cinayət Məcəlləsinin 100 (təcavüzkar müharibə başlama), 107 (deportasiya və məcburi köçürmə), 115.2 (müharibə qanunlarını pozma), 116 (beynəlxalq humanitar hüququ pozma), 120 (qəsdən adam öldürmə) və digər maddələri ilə ittiham irəli sürülüb.

Eyni zamanda, keçmiş separatçı liderlər — Arayik Harutyunyan, Arkadi Qukasyan, Bako Sahakyan, Davit Babayan, Davit İşxanyan və daha 15 nəfərin də məhkəməsi davam edir.

Bu iş üzrə zərərçəkmiş qismində tanınanların sayı yarım milyondan çoxdur — onlar Qarabağ müharibəsində həyatını itirənlərin hüquqi varisləri, xəsarət alanlar və məcburi köçkünlərdir.