1993–1999-cu illərdə Prezident Heydər Əliyevin köməkçisi və Prezident Katibliyinin rəhbəri olmuş Eldar Namazov, dövlət çevrilişinə cəhddə ittiham olunan akademik Ramiz Mehdiyev barədə danışarkən onun təbliğatını aparmış şəxslərlə bağlı diqqətçəkən məlumatlar açıqlayıb.

“Yeni Azərbaycan” TV-yə müsahibəsində Eldar Namazov bildirib ki, Ramiz Mehdiyevin təsiri altında təbliğat aparan bir sıra şəxslər sonradan cəzalandırılıb. Onun sözlərinə görə, bu şəxslər arasında bəzi icra başçıları ilə yanaşı, Prezident Aparatının keçmiş tərcüməçisi də olub.

Eldar Namazov həmin tərcüməçinin adını çəkməsə də, **“Yeni Sabah”**ın məlumatına görə, söhbət uzun illər Heydər Əliyevin tərcüməçisi kimi çalışmış Rauf Hüseynovdan gedir.

Rauf Hüseynov kimdir?
• Əslən Naxçıvandandır.
• Azərbaycan Dillər Universitetinin məzunudur.
• 1990-cı illərin sonlarında–2000-ci illərin əvvəllərində Prezident Heydər Əliyevin şəxsi tərcüməçisi kimi çalışıb.
• O, Heydər Əliyevin mühüm xarici səfərlərində, o cümlədən 1997-ci ildə ABŞ prezidenti Bill Klintonla görüşündə tərcüməçi olub.
• Qısa müddətdə siyasi karyerasını irəlilədə bilmiş, Prezident tərəfindən Xarici əlaqələr şöbəsinin müdir müavini vəzifəsinə təyin edilmişdi.

Lakin Eldar Namazovun açıqlamalarına görə, Rauf Hüseynovun Ramiz Mehdiyevin təbliğatına qoşulması onun karyerasının gözlənilmədən sona çatmasına səbəb olub. Məhz bu səbəbdən o, Prezident Aparatından uzaqlaşdırılıb və sonradan ölkəni tərk edib.

Məlumata görə, Rauf Hüseynov hazırda Amerikada yaşayır və biznes fəaliyyəti ilə məşğuldur.

Uzun illər davam edən qeyri-müəyyənlikdən sonra, Eldar Namazovun açıqlamaları Rauf Hüseynovun vəzifədən uzaqlaşdırılması ilə bağlı suallara ilk dəfə olaraq aydınlıq gətirib.