Bakıda Şəhidlər Xiyabanında qeyri-etik videolar çəkərək sosial şəbəkələrdə paylaşan Səudiyyə Ərəbistanı vətəndaşları – Alzaman Mahdi Ali, Alghabr Mohammad Hussain və Alghabr Mahdi Mohammada ilə bağlı məhkəmə prosesi keçirilib.

Səbail Rayon Məhkəməsində təqsirləndirilənlərin hüquq və vəzifələri izah olunarkən məlum olub ki, Alghabr Mohammad Hussain Səudiyyə Ərəbistanı Daxili İşlər Nazirliyində tədqiqatçı işləyir.

Təqsirləndirilənlər məhkəmədə açıqlama verərək hərəkətlərinin mahiyyətini dərk etmədiklərini bildirib və Azərbaycan xalqından, şəhid ailələrindən və qazilərdən üzr istəyiblər:
“Azərbaycan bizim üçün dost və doğma ölkədir. Həmin yerin Azərbaycan xalqı üçün müqəddəs olduğunu bilməmişik. Buna görə üzr istəyirik.”

Dövlət ittihamçısının açıqlamasına görə, avqustun 16-da Şəhidlər Xiyabanına gələn şəxslər bir neçə şəhidin məzarı üzərində qeyri-etik hərəkətlər ediblər. Araşdırmalar göstərib ki, həmin şəxslər turist kimi Bakıya avqustun 13-də gəliblər və videonu sosial şəbəkələrdə yaymayıblar.

Faktla bağlı Cinayət Məcəlləsinin 245-ci maddəsi (Qəbir üzərində təhqiredici hərəkət) ilə cinayət işi başlanılıb. Polis tərəfindən hər üç şəxs saxlanaraq istintaqa cəlb edilib.