USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Azər Qasımlının həbs şəraiti ilə bağlı narahatlıqlar səsləndirildi
Həbsdə olan müxalif siyasətçi Azər Qasımlının saxlanıldığı Umbakı Penitensiar Kompleksində məhbusların saxlanma şəraiti ilə bağlı iddialar açıqlanıb.
Bu barədə onun həyat yoldaşı Samirə Qasımlı sosial media hesabında paylaşım edib.
Onun sözlərinə görə, Azər Qasımlının yerləşdirildiyi kamera 4 nəfərlik olsa da, hazırda orada 6 nəfər saxlanılır. Bildirilir ki, məhbuslardan biri “Hepatit C” xəstəliyindən əziyyət çəkir.
Samirə Qasımlı qeyd edib ki, həyat yoldaşı həmin məhbusun səhhətinin ağır olduğunu bildirərək onun təcili xəstəxanaya yerləşdirilməsini istəyib. İddiaya görə, məhbus əvvəlcə Penitensiar Xidmətin Müalicə Müəssisəsinə aparılıb, lakin bir həftə sonra yenidən Umbakı həbsxanasına qaytarılıb.
S.Qasımlının sözlərinə görə, Ombudsman Aparatının nümayəndələri və Ədliyyə Nazirliyi Baş Tibb İdarəsinin əməkdaşları da vəziyyətlə maraqlanıblar və xəstənin müalicəyə ehtiyacı olduğu qənaətinə gəliblər.
O, həmçinin həbsxana rəhbərliyinin Azər Qasımlıya kiçik ölçülü mikrodalğalı isidicinin verilməsinə icazə vermədiyini bildirib.
Azər Qasımlı martın 11-də Bakı Ağır Cinayətlər Məhkəməsinin hökmü ilə 12 il müddətinə azadlıqdan məhrum edilib. O, Cinayət Məcəlləsinin 182.3.2-ci maddəsi ilə — külli miqdarda əmlak əldə etmək məqsədilə hədə-qorxu ilə tələb etmədə təqsirli bilinib.
Azər Qasımlı ittihamları qəbul etmir və həbsinin siyasi motivli olduğunu bildirir.
