USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Samirə Qasımlının məsuliyyətə cəlb olunması ilə bağlı məhkəmə prosesi başlayıb
Aprelin 24-də Binəqədi Rayon Məhkəməsi-ndə həbsdə olan müxalif siyasətçi Azər Qasımlı-nın həyat yoldaşı Samirə Qasımlıya qarşı xüsusi ittiham qaydasında qaldırılmış şikayət üzrə hazırlıq iclası keçirilib.
Samirə Qasımlının Toplum TV-yə verdiyi məlumata görə, hakim Zamiq Bağırov-un sədrliyi ilə keçirilən iclasda onun anket məlumatları dəqiqləşdirilib.
Daha sonra müdafiə tərəfi işin Yasamal Rayon Məhkəməsi-nə göndərilməsi üçün şifahi vəsatət qaldırıb. Bu, Samirə Qasımlının hazırda Yasamal rayonu ərazisində yaşaması və ittiham olunduğu sosial media paylaşımlarını həmin ünvandan etməsi ilə əsaslandırılıb.
Hakim vəsatətin yazılı şəkildə təqdim olunacağı halda baxılacağını bildirib. Proses mayın 1-nə təxirə salınıb.
Samirə Qasımlı daha əvvəl həyat yoldaşını hədə-qorxuda ittiham etmiş Qurbanəli Yusifov tərəfindən məhkəməyə verilib. O, Samirə Qasımlını Cinayət Məcəlləsinin 147.1-ci maddəsi və Cinayət Məcəlləsinin 148-ci maddəsi ilə ittiham edir.
Qurbanəli Yusifov iddia edir ki, Samirə Qasımlı Facebook hesabındakı paylaşımlarında onu hədələyib və böhtan atıb.
Bununla yanaşı, Daxili İşlər Nazirliyi tərəfindən Samirə Qasımlının ölkədən çıxışına qadağa qoyulduğu bildirilir. O isə daha əvvəl sosial media hesabında yaydığı müraciətdə məhkəməyə verilməsini hakimiyyətin sifarişi adlandırıb.
