Vladimir Putin Ermənistanın Avropaya inteqrasiya məsələsində seçim etməli olduğunu bildirərək, bu prosesin “Ukrayna ssenarisi”nə bənzəyə biləcəyinə eyham vurub.

Rusiya prezidenti Qələbə Günü paradından sonra keçirdiyi mətbuat konfransında deyib ki, Yerevan geosiyasi istiqamətini mümkün qədər tez müəyyənləşdirməlidir.

“Ermənistan əhalisinə və bizim kimi əsas iqtisadi tərəfdaşa münasibətdə mümkün qədər tez qərar vermək düzgün olardı. Məsələn, referendum keçirə bilərlər”, – Putin bildirib.

Onun sözlərinə görə, belə bir referendum Moskvanın “müvafiq nəticələr çıxarmasına” və tərəflər arasında “yumşaq, ağıllı və qarşılıqlı faydalı ayrılığı” davam etdirməsinə imkan verə bilər.

Putin, həmçinin Ermənistanın Avropa İttifaqı ilə yaxınlaşmasının gələcəkdə Avrasiya İqtisadi İttifaqı sammitlərindən birində müzakirə edilməsini təklif edib.

Rusiya lideri çıxışı zamanı Ermənistanın Avropa kursu ilə Ukraynada baş vermiş hadisələr arasında paralel aparıb.

“İndi hər şey Ukrayna ssenarisi istiqamətində cərəyan edir. Bütün bunlar Ukraynanın Avropa İttifaqına qoşulmaq cəhdindən başladı”, – deyə Putin vurğulayıb.

Ermənistanın xarici işlər naziri Ararat Mirzoyan isə cavabında bildirib ki, ölkəsi Avropa İttifaqı ilə bağlı qərarı “münasib vaxtda” verəcək.

“Biz anlayırıq ki, vaxt gələndə Ermənistanın Aİİ ilə Avropa İttifaqı arasında seçim etməsi lazım olacaq. Hazırda biz Aİİ-nin üzvüyük, amma Ermənistan cəmiyyətində Avropayönümlü istəklərin olması da sirr deyil”, – Mirzoyan deyib.

2025-ci ildə Ermənistan parlamenti ölkənin Avropaya inteqrasiya prosesi ilə bağlı qanun qəbul edib. Yaxın zamanda Yerevanda keçirilən Avropa Siyasi Birliyinin sammitində Ermənistanla Aİ arasında münasibətlərin inkişafına dair sənədlər də imzalanıb.