Ermənistanda parlament seçkilərində iştirak edən bir sıra müxalif siyasi qüvvələr baş nazir Nikol Paşinyanın hakim “Vətəndaş Müqaviləsi Partiyası”nın qələbəsi ilə bağlı açıqlamasını tənqid ediblər.

Müxalifət nümayəndələri Mərkəzi Seçki Komissiyasının yekun nəticələri açıqlamasını gözləməyə çağıraraq, Paşinyanı seçki prosesinə müdaxilə etməkdə, komissiyaya təzyiq göstərməkdə və hakimiyyəti mənimsəməyə cəhd etməkdə ittiham ediblər.

“Güclü Ermənistan bloku”nun baş nazirliyə namizədi Samvel Karapetyan seçkiləri “rüsvayçı” adlandırıb. O iddia edib ki, hakim partiyanın nəticələrinin zəifləməsi səbəbindən səslərin hesablanması prosesi ləngidilib. Karapetyanın sözlərinə görə, blokun 700-dən çox nümayəndəsi saxlanılıb və onlara qarşı xüsusi tədbirlər davam edir.

“Birlik Qanadları Partiyası”nın lideri Arman Tatoyan isə Paşinyanın partiyasının seçkilərdə qalib gəldiyini və hökuməti təkbaşına formalaşdıracağını bəyan etməsini Konstitusiyaya zidd adlandırıb.

Tatoyan bildirib ki, Paşinyan səslərin cəmi 10 faizindən bir qədər çoxu hesablandığı vaxt belə bəyanat verib və həmin anda paytaxt Yerevan üzrə nəticələr hələ açıqlanmamışdı.

Partiya həmçinin Paşinyanın müxalifət liderlərinin məsuliyyətə cəlb oluna biləcəyi barədə fikirlərini qanun pozuntusu kimi qiymətləndirib və bunu Mərkəzi Seçki Komissiyasına təsir göstərmək cəhdi adlandırıb.

“Ermənistan bloku” da baş nazirin seçkilərin yekun nəticələri açıqlanmadan öz qələbəsini elan etməsini hakimiyyətin mənimsənilməsinə yönəlmiş addım kimi dəyərləndirib. Blok seçki kampaniyası və səsvermə zamanı inzibati resurslardan istifadə və seçicilərə təzyiq göstərilməsi ilə bağlı iddiaların hüquqi qiymət almasını tələb edib.

Blokun nümayəndəsi İşxan Saqatelyan bildirib ki, məntəqələrdən daxil olan məlumatların emalı davam edir və yekun nəticələrdən sonra növbəti addımlar açıqlanacaq.

Tənqidlərə qoşulan “Maariflənmiş Ermənistan Partiyası”nın lideri Edmon Marukyan da Paşinyanın çıxışı zamanı səslərin yalnız kiçik hissəsinin hesablandığını vurğulayıb.

Qeyd edək ki, Paşinyan təxminən 500 seçki məntəqəsinin nəticələri məlum olduqdan sonra “Vətəndaş Müqaviləsi”nin seçkilərdə qalib gəldiyini və yeni hökuməti formalaşdıracağını bəyan etmişdi.

Ermənistanda Milli Məclisə seçkilər iyunun 7-də keçirilib. Seçkilərdə 16 partiya və 2 siyasi blok iştirak edib.