İyunun 15-də Almaniyanın paytaxtı Berlin şəhərində Azərbaycanda həbsdə olan qadın jurnalistlərə və dini inanclı qadınlara dəstək məqsədilə aclıq aksiyası təşkil olunacaq.

Aksiya “Müsəlman Birliyi” təşkilatının təşəbbüsü ilə Almaniya Federal Kanslerliyinin (Bundeskanzleramt) qarşısında keçiriləcək. Tədbirin yerli vaxtla saat 11:00-da başlaması nəzərdə tutulur.

Təşkilatçıların bildirdiyinə görə, aksiyanın məqsədi Almaniya hökumətinin, Avropa institutlarının və beynəlxalq insan hüquqları təşkilatlarının diqqətini Azərbaycanda həbsdə olan qadın jurnalistlərin və dini inanclı qadınların vəziyyətinə yönəltməkdir.

Məlumata əsasən, aksiya hazırda azadlıqdan məhrum edilmiş doqquz qadın jurnalistə və altı dini inanclı qadına həsr olunacaq. İştirakçılar onların jurnalist, vətəndaş və ya dini fəaliyyətlərinə görə həbs olunduqlarını bildirərək dərhal azad edilmələrini tələb edəcəklər.

Aksiyada adları xüsusi vurğulanacaq qadın jurnalistlər sırasında Sevinc Vaqifqızı, Nərgiz Absalamova, Elnarə Qasımova, Aynur Elgünəş, Aytac Əhmədova, Aysel Umudova, Xəyalə Ağayeva, Fatimə Mövləmli və Ülviyyə Əli yer alır.

Bununla yanaşı, Nigar Bağırova, Aytən İbrahimova, Şahla Fərəcova, Xoşqədəm Quliyeva, Şərqiyyə Sadıqova və Arzu Hüseynovanın da işlərinə diqqət çəkiləcəyi qeyd olunur.

Təşkilatçılar bildirirlər ki, aksiya Azərbaycanda müstəqil media, vətəndaş cəmiyyəti və dini icmalara qarşı təzyiqlər fonunda həbsdə olan qadınlarla həmrəylik nümayiş etdirmək məqsədi daşıyır.

Onların fikrincə, qadın jurnalistlərin və dini inanclı şəxslərin həbsi təkcə ölkədaxili insan hüquqları məsələsi deyil, həm də Azərbaycanla siyasi və diplomatik əlaqələrə malik Avropa qurumları üçün ciddi narahatlıq doğuran mövzudur.

Təşkilatçılar insan hüquqları müdafiəçilərini, jurnalistləri, vətəndaş cəmiyyəti fəallarını, Azərbaycan diasporunun üzvlərini və demokratik institutların nümayəndələrini aksiyaya qoşulmağa və həmrəylik göstərməyə çağırıblar.

Aclıq aksiyasının 15 iyun 2026-cı il tarixində, saat 11:00-da Berlin şəhərində Almaniya Federal Kanslerliyinin qarşısında (Willy-Brandt-Straße 1, 10557 Berlin,) başlanacağı bildirilir.