Bakıda nəqliyyat sıxlığının azaldılması məqsədilə dəyişkən iş qrafikinin tətbiqi gündəmə gəlib.

Bu barədə Milli Məclisin deputatı, iqtisadçı Vüqar Bayramov məlumat verib. Onun sözlərinə görə, “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı”na əsasən, dövlət qurumlarının, təhsil və tibb müəssisələrinin, eləcə də digər hüquqi və fiziki şəxslərin fəaliyyətinin dəyişkən iş qrafiki əsasında təşkili nəzərdə tutulur.

Deputat bildirib ki, proqramda bu tədbirin 2026-cı ildə həyata keçirilməsi planlaşdırılıb.

Vüqar Bayramovun sözlərinə görə, dəyişkən iş qrafikinin tətbiqi ilə bağlı Əmək və Əhalinin Sosial Müdafiəsi Nazirliyi, Elm və Təhsil Nazirliyi, Səhiyyə Nazirliyi, TƏBİB və Nəqliyyatı Əlaqələndirmə Şurası tərəfindən aparılan təhlillər yaxın vaxtlarda yekunlaşmalıdır.

“Bununla da Nazirlər Kabineti tərəfindən təsdiqlənəcək siyahılara uyğun olaraq dəyişkən iş rejimi təşkil ediləcək”, – deputat qeyd edib.

O vurğulayıb ki, bir çox inkişaf etmiş ölkələrdə, xüsusilə Avropa dövlətlərində dəyişkən iş qrafiki uzun müddətdir tətbiq olunur və müsbət nəticələr verir. Təhlillər göstərir ki, fərqli işə başlama saatları nəqliyyat axınının gün ərzində daha bərabər paylanmasına imkan yaradır, səhər və axşam saatlarında müşahidə olunan sıxlığı azaldır.

Deputatın fikrincə, bu model ictimai nəqliyyatda yüklənmənin azalmasına, işçi məhsuldarlığının artmasına və şəhər infrastrukturuna düşən yükün minimuma enməsinə şərait yaradır.

“Gözlənilir ki, 2026-cı ildə Azərbaycanda da dövlət proqramının tələblərinə uyğun olaraq müxtəlif sektorlarda iş saatlarının mərhələli şəkildə dəyişdirilməsi həyata keçiriləcək. Bu modelə əsasən bütün müəssisələr eyni vaxtda fəaliyyətə başlamayacaq və bu da nəqliyyat sıxlığının azalmasına təsir göstərəcək”, – Vüqar Bayramov bildirib.

O əlavə edib ki, dəyişkən iş qrafiki nəqliyyat problemlərini tam aradan qaldırmaq üçün deyil, mövcud sıxlığı azaltmaq məqsədi daşıyır. Nəqliyyat sistemində köklü dəyişikliklərin əldə olunması üçün infrastrukturun genişləndirilməsi və digər əlavə tədbirlərin də həyata keçirilməsi vacibdir.